पुणे - राज्यात तापमानाचा पारा वाढला आहे. पुणे शहराचे तापमान 37 अंश सेल्सियसवर पोहोचले आहे. एकीकडे उन्हाच्या या चटक्यापासून पुणेकर हैराण असताना, दुसरीकडे मात्र पुण्याच्या कात्रज प्राणी संग्रहालयातील हत्तीणी मीरा आणि जानकी या कडाक्याच्या उन्हात मनसोक्त पाण्यात डुंबण्याचा आनंद घेत आहेत. गेल्या वर्षी महापालिकेच्या माध्यमातून बांधण्यात आलेल्या स्विमिंगपूलमध्ये ही जोडी दिवसातून 3 वेळा आंघोळ करत आहे.
कात्रज येथील प्राणीसंग्रहालयात गेल्या 18 वर्षांपासून मीरा आणि जानवीची ही जोडी वास्तव्याला आहे. त्यांच्यासाठी खंदक देखील खांदण्यात आले आहे. यापूर्वी या दोन्ही हत्तीणींना साखळीने बांधून आंघोळ घातली जात होती. मात्र त्यांना नैसर्गिक अधिवासाप्रमाणे आंघोळ करता यावी, म्हणून महापालिकेच्या वतीने याठिकाणी स्विमिंगपूल बांधण्यात आला आहे. या स्विमिंगपूलमध्ये मनसोक्त डुंबण्याचा आनंद मीरा आणि जानकी घेत आहेत.
मीरा आणि जानकीच्या आरोग्याची विशेष काळजी
उन्ह्याळ्यात हत्तींचे आरोग्य चांगले राहावे यासाठी पाण्याची व्यवस्था उपलब्ध करून द्यावी लागते. शरीराचे तापमान नियंत्रित ठेवण्यासाठी त्यांच्या अंगावर वारंवार पाण्याचा फवारा मारावा लागतो. अशा सर्वच दृष्टीने हा स्विमिंगपूल उपयोगी ठरत आहे. उन्हाळ्या व्यतिरिक्त इतर दिवशी देखील या दोन्ही हत्तीणींची विशेष काळजी घेण्यात येते. त्यांना योग्य तो आहार देण्यात येतो, तसेच त्यांची डॉक्टरांकडून नियमित तपासणी देखील केली जाते.
