मुंबई - वाढत्या कोरोनाच्या प्रादुर्भावामुळे राज्यभरात निर्बंध लागू करण्यात आले आहे. त्यामुळे या काळात गावाकडे जाणाऱ्यांची संख्या वाढली असून रेल्वे स्थानकावर मोठ्या प्रमाणात गर्दी होत होती. या गर्दीवर नियंत्रण मिळवण्यासाठी मध्य रेल्वेकडून मुंबई विभागातील सात स्थानकावरील प्लॅटफॉर्म तिकिटांचे दर पाच पटीने वाढविण्यात आले होते. मात्र, आता पुन्हा फलाट तिकिटांचे दर 50 रुपयांवरून 10 रुपये करण्यात आले आहेत. रुग्ण, दिव्यांग, गर्भवती महिला यांची ने-आण करणाऱ्या प्रवाशांना त्यामुळे दिलासा मिळाला आहे.
मुंबईत 7 रेल्वे स्थानकांवर निर्णय लागू
कोरोच्या पार्श्वभूमीवर म्हणून गेल्या वर्षी रेल्वे स्थानकावर गर्दीवर नियंत्रण मिळवण्यासाठी आणि खबरदारी म्हणून भारतीय रेल्वेकडून रेल्वेच्या प्लॅटफॉर्म तिकिटाचे दर पाच पटीने वाढवण्यात आले होते. मात्र, त्यानंतर लॉकडाऊननंतर प्लॅटफॉर्म तिकीट देणे बंद केले होते. मात्र, १५ मार्च २०२१पासून मुंबई उपनगरातील महत्त्वाच्या 7 रेल्वे स्थानकांवर प्लॅटफॉर्म रेल्वे तिकीट देण्यात निर्णय घेतला होता. या प्लॅटफॉर्म तिकिटाचे दर 10 वरून 50 रुपये करण्यात आले होते. ज्यात छत्रपती शिवाजी महाराज टर्मिनस, दादर, लोकमान्य टिळक टर्मिनस, ठाणे, कल्याण, पनवेल आणि भिवंडी रोड या स्थानकाचा समावेश आहे. त्यामुळे या स्थानकावर आता वयोवृद्ध आणि दिव्यांग प्रवाशांना रेल्वे स्थानकावर सोडण्यासाठी किंवा आणण्यासाठी त्यांच्या नातेवाईक रेल्वे स्थानकांवर येणे शक्य झाले होते.
प्रवाशांना दिलासा
मागील वर्षी कोरोनाच्या पार्श्वभूमीवर रेल्वेचे प्लॅटफॉर्म तिकिटांचे दर 10 रुपयांवरून 50 रुपये करण्यात आले होते. मात्र त्यानंतर 23 मार्च 2020पासून संपूर्ण देशात लॉकडाऊन लागू करण्यात आले होते. त्यामुळे संपूर्ण देशाची रेल्वे प्रवासी वाहतूक ठप्प होती. जून 2020पासून देशभरात विशेष गाड्या चालवण्यात आलेल्या होत्या. तेव्हा फक्त आरक्षित तिकीट असणाऱ्या प्रवाशांना रेल्वे स्थानकावर प्रवेश दिला गेला. मात्र, आता कोरोनाचा प्रादर्भाव कमी झाला होत आहे. त्यामुळे पुन्हा एकदा वयोवृद्ध आणि दिव्यांग प्रवाशांच्या सोयीसाठी प्लॅटफॉर्म तिकिटाचे दर 50 रुपयांवरून 10 रुपये करण्यात आले आहे.
'या' स्थानकात 50 रुपये
रेल्वे प्रशासनाने दिलेल्या माहितीनुसार, मध्य रेल्वेच्या मुंबई, भुसावळ, सोलापूर या विभागातील फलाट तिकीट 50 रुपयांवरून 10 रुपये करण्यात आले आहे. तर, अद्याप पुणे विभागातील पुणे, कोल्हापूर, मिरज, सांगली, हातकणंगले या पाच ठिकाणी आणि नागपूर विभागातील सर्व स्थानकात 50 रुपये प्लॅटफॉर्म तिकीट ठेवण्यात आले आहे.
