पणजी - गोवा विधानसभेचे पावसाळी अधिवेशन सध्या सुरू आहे. काँग्रेस आमदार रेजिनाल्ड यांनी विचारलेल्या प्रश्नावर उत्तर देत असताना राणे यांनी सरकार रोजगार प्रश्न सोडवण्यासाठी करत असलेल्या उपाययोजनांची माहिती दिली. काँग्रेस आमदार रेजिनाल्ड यांनी सरकार रोजगाराचा प्रश्न सोडवण्यासाठी काय उपाययोजना करत आहेत? असा प्रश्न विचारला होता. त्यावर राणे यांनी कोणकोणत्या ठिकाणी नवे औद्योगिक वसाहत उभारले जातील व कोणते उद्योग उभारण्यास प्राधान्य दिले जाईल, हे स्पष्ट केले.
राणे यांनी लेखी उत्तरात दिलेल्या माहिती अनुसार, उत्तर गोव्यातील मावळींगे-सत्तरी येथे 1 लाख 38 हजार 125 चौरस मीटर क्षेत्रात, शिरसई-बार्देश येथे 8 लाख 65 हजार, 105 चौरस मीटर क्षेत्रात तर दक्षिण गोव्यातील पैंगीण-काणकोण मध्ये 3 लाख 86 हजार 488 चौरस मीटर क्षेत्रात नव्या औद्योगिक वसाहती उभारण्यात येतील. मात्र, अद्याप कोणत्याही उद्योगाला जागा देण्यात आलेली नाही. या ठिकाणी प्रदुषण विरहित असे औषध निर्मिती आणि बायोटेक प्रकल्प उभारण्याला प्राधान्य दिले जाईल, असेही त्यांनी म्हटले आहे.
गोवा सरकार स्थानिकांना रोजगार देण्यासाठी प्रयत्नशील आहे. यासाठी तीन ठिकाणी नव्या औद्योगिक वसाहती उभारण्यात येणार आहे. ज्यामुळे किमान 10 हजार गोमंतकीयांनी रोजगार उपलब्ध होईल, अशी माहिती उद्योग मंत्री विश्वजीत राणे यांनी लेखी उत्तरात दिली आहे. गुरुवारी मुख्यमंत्री डॉ. प्रमोद सावंत यांनी अर्थसंकल्पावरील भाषणाचे वाचन केले. त्यानंतर अर्थसंकल्पावर सुरू असलेल्या चर्चेत शुक्रवारी रोजगार क्षेत्रावरही चर्चा करण्यात आली.
