पणजी - विधानसभा पोटनिवडणुकीत मतदारांनी मोठ्या संख्येने मतदानासाठी घराबाहेर पडावे. यासाठी गुरूवारी सायंकाळी पणजीत गोवा निवडणूक अधिकाऱ्यांतर्फे मतदार जागृतीसाठी मोटारसायकल फेरी काढण्यात आली.
पणजी पोटनिवडणुकीत बुथस्तरीय अधिकारी म्हणून काम पाहणाऱ्या अधिकाऱ्यांचा सहभाग असलेल्या या मोटारसायकल फेरीला उत्तर गोव्याचे लोकसभा निवडणूक निर्णय अधिकारी तथा जिल्हाधिकारी आर. मेनका यांनी झेंडा दाखवला. यावेळी पणजी विधानसभा मतदारसंघ निवडणूक निर्णय अधिकारी विवेक एच. पी. उपस्थित होते.
लोकसभा निवडणूक काळात मतदान जागृतीसाठी निवडणूक आयोगातर्फे राज्यभर विविध कार्यक्रम आयोजित करण्यात आले होते. त्याचा परिणाम लोकसभा मतदानात दिसून आला.
गुरूवारच्या फेरीविषयी बोलताना निवडणूक निर्णय अधिकारी विवेक एच. पी. म्हणाले, एकही मतदार मतदानापासून वंचित राहू नये. अधिकाधिक लोकांनी आपला मतदानाचा हक्क बजावावा यासाठी मतदारांमध्ये जागृती घडवून आणण्यासाठी या फेरीचे आयोजन करण्यात आले आहे.
