पणजी - पोटनिवडणुकीत काँग्रेसला मिळणारा प्रतिसाद पाहून भाजप उमेदवार सिद्धार्थ कुंकळ्येकर हे पक्षाध्यक्षांच्या नावाने मतदारांना धमकावत आहेत, असा आरोप काँग्रेसने केला. तसेच ही राजकारणाची भाषा नव्हे, असे म्हणत काँग्रेसने याचा निषेध केला आहे.
काँग्रेस भवनमध्ये आयोजित करण्यात आलेल्या पत्रकार परिषदेत प्रदेशाध्यक्ष गिरीश चोडणकर म्हणाले, पणजीमधील निवडणूक प्रचारात काँग्रेस आमदार, पदाधिकारी आणि कार्यकर्ते झोकून काम करत आहेत. तर भाजप विभागलेली दिसत आहे. त्यामुळे भाजप उमेदवार सिध्दार्थ कुंकळ्येकर हे भाजपचे राष्ट्रीय अध्यक्ष अमित शाह यांच्या नावाने मतदारांना धमकावत आहे.
जे सरकारी अधिकाऱ्यांचे नातेवाईक काँग्रेसचा प्रचार करत आहेत, त्यांची बदली करण्याची धमकी गोव्याचे मुख्यमंत्री देत आहेत. मुख्यमंत्र्यांनी आपल्या मर्यादेत राहून प्रचार करावा. तसेच सरकारी अधिकारीही भाजप सत्तेत आहे, म्हणून भाजपला मतदान करावे यासाठी आपल्या हाताखालील कर्मचाऱ्यांना धमकावत आहेत. हे त्यांनी थांबवावे.
कुंकळ्येकर हे पणजी स्मार्ट सिटी प्रकल्प हाताळणाऱ्या इमॅजीन पणजीचे संचालक असताना भ्रष्टाचार केला आहे, असा आरोप चोडणकर यांनी केला. कुंकळ्येकर यांना यासंदर्भात श्वेतपत्रिका काढण्यासाठी वेळ दिला होता. परंतु, त्यांनी तसे केले नाही, अथवा ते माध्यमांसमोर आलेले नाहीत.
इमॅजीन पणजीचे कार्यालय दूरूस्त करण्यासाठी पहिल्यांदा अंदाजे ५ कोटींची निविदा काढण्यात आली होती. परंतु, ते बाजूला करत त्यात पाचपटीने वाढ करून निविदा काढण्यात आली, असे का करण्यात आले, याची दक्षता खात्याकडून चौकशी झालीच पाहिजे, अशी मागणी चोडणकर यांनी केली.
इमॅजीन पणजीचे कार्यालय असलेली इमारत ही शंभरवर्षे जूनी आहे. यापूर्वी तेथे गोव्याचे सचिवालय होते. त्याची दुरूस्ती करण्यासाठी इमारतीचा मूळ आराखडा कोणाकडे आहे ? निविदा मागविताना वाढविण्यात आलेले १५ लाख कोणाच्या फायद्यासाठी आहे ? हे कुंकळ्येकरांनी जाहीर करावे, असे आवाहन त्यांनी केले.
