पणजी - सत्ता स्थापनेत पाठिंबा देण्यासाठी भाजपचे (BJP Leaders) अनेक केंद्रीय नेते मला संपर्क करण्याचा प्रयत्न करत आहेत, असा गौप्यस्फोट काँग्रेस नेते व उमेदवार मायकल लोबो (Michael Lobo) यांनी पत्रकार परिषदेत केला आहे. सत्ता स्थापनेच्या पाठिंब्यासाठी भाजप हे विरोधी पक्षांवर ईडी, सीबीआयचा दबाव आणत आहे, असेही ते म्हणाले.
मी काँग्रेस पक्षाचा घटक -
मागची 10 वर्षे मी भाजपचा आमदार व मंत्री होतो. मात्र, माझी टर्म पूर्ण होताच मी भाजपच्या अंतर्गत वादाला कंटाळून काँग्रेस पक्षात प्रवेश केला. मात्र, भाजपचे बडे नेते माझ्याशी संपर्क करून पुन्हा पक्षात येण्याविषयी मला विनंत्या करतात, पण मी त्यांच्या दबावाला बळी पडणार नाही. कारण मी आता काँग्रेस पक्षाचा सदस्य आहे. त्यामुळे आता माझा आणि भाजपचा काहीही संबंध नसल्याचे लोबो यांनी आज पत्रकार परिषदेत सांगितले.
गोव्यात काँग्रेसला पूर्ण बहुमत
राज्यात काँग्रेस पक्षाला पूर्ण बहुमत मिळणार असून, निकलादिवशीच आम्ही राज्यपालांकडे सत्ता स्थापनेचा दावा करणार आहोत. पुढच्या दोन दिवसात राज्यात काँग्रेसचे नवे सरकार अस्तित्वात येणार असल्याचा विश्वास लोबो यांनी यावेळी व्यक्त केला.
विरोधकांना ईडी आणि सीबीआयची भीती -
भाजपला यंदा गोवेकर सत्तेपासून दूर ठेवणार आहेत, त्यामुळे बैचेन झालेल्या भाजपने सत्ता स्थापनेसाठी विरोधकांची मदत घेण्याचे प्रयत्न सुरू केले आहेत. मात्र, राज्यातील छोटे प्रादेशिक पक्ष यावेळी मात्र भाजपला साथ देणार नाहीत. त्यामुळे या पक्षांना आपल्या जाळ्यात ओढण्यासाठी भाजप त्यांना ईडी आणि सीबीआयच्या धमक्या देत असून, अनेक नेत्यांचे फोन देखील टॅप होत असल्याचा आरोप काँग्रेसने केला आहे.
