नाशिक - राजस्थान सरकारच्या पर्यटन विभागाचे ( Advertising of Rajasthan tourism ) शौचालयावर जाहिराती करण्याच्या कामासाठी मक्ता मिळवून कोट्यवधीचा फायदा करुन देण्याचे आमिष दाखवत नाशिक येथील व्यवसायिकाला तब्बल 6 कोटी 80 लाखांचा गंडा घालण्यात आला आहे. याप्रकरणी न्यायालयाच्या आदेशान्वये जोधपूर येथील 15 संशयितांच्या विरोधात नाशिकच्या गंगापूर पोलीस ठाण्यात फसवणुकीचा गुन्हा दाखल करण्यात आला आहे.
याबाबत पोलिसांनी दिलेली अधिक माहिती अशी की, सुशील पाटील (रा. गंगापूर रोड, नाशिक) यांनी दिलेल्या तक्रारीनुसार 2018 ते 2020 या कालवधीत पाटील आणि त्यांच्या संबंधित व्यवसायिकांना संशयीत सचिन पुरुषोत्तम वेलेरा, वैभव गेहलोत (दोघे रा. जोधपूर), किशन कांतेलिया, सरदारसिंह चौहान, नीडल क्राफ्ट कंपनीचे अधिकृत प्रतिनिधी प्रवीणसिंह चौहान, सुहाभ मकवाल, निरोवभाई विमाभट, राजबीरसिंह शेखावत, बिस्वरंजन मोहंती, सावनकुमार पारनेर, विनोदचंद्र प्रकाश, संजयकुमार देसाई, विराज पंचाल, रिशिता शाह यांनी संगनमत कुन राजस्थान सरकारच्या पर्यटन विभागाच्या जाहिरातीचे सर्व मक्ते मिळवून देण्याचे आमिष दाखवून फसवणूक केल्याचा गुन्हा दाखल करण्यात आला आहे.
व्यवहार पूर्ण न करता फसवणूक - सुशील पाटील यांनी त्यांचे सहकारी व्यवसायिकांना या कामकाजाची माहिती दिली. त्यानंतर 2018 ते 2020 या कालावधीत 3 कोटी 96 लाख 54 हजार 778 रुपये आरटीजीएसद्वारे संशयित आरोपींच्या बँक खात्यात पाठवण्यात आले. तर काही रक्कम रोख रक्कमही दिली, असे एकूण 6 कोटी 80 लाख रुपये दिले. ई-टेंडर व्यवहार पूर्ण न करता संशयितांनी फसवणूक केल्याचे तक्रारीत म्हटले आहे.
बड्या नेत्यांची गुंतवणूक - राजस्थान सरकारचे ई-टेंडर मिळण्यासाठी ऑनलाइन प्रक्रिया करावी लागते. यामध्ये पाटील यांच्यासह शहरातील आणि राज्यातील काही बड्या राजकीय नेत्यांची मोठी रक्कम गुंतवणूक केली असल्याची शक्यता आहे. तसेच एका मंत्र्याचीही यामध्ये मोठी गुंतवणूक असल्याची चर्चा आहे.
हेही वाचा - Suicide Attempt In Nashik : नाशकात आत्महत्येच्या तयारीत असलेल्या युवकाला तरुणांनी शिताफीने वाचवले
