नाशिक - नाशिक महानगरपालिकेचे आयुक्त कैलास जाधव ( Nashik Commissioner Kailas Jadhav Transfer ) यांची तडकाफडकी बदली करण्यात आली आहे. म्हाडाची साडे तीन ते चार हजार घरे नियमाप्रमाणे एमएचआरडीएला हस्तांतरीत न केल्याने त्यांना पदावरून हटवण्यात आले आहे. तसेच, त्यांच्या चौकशीचे आदेश विधान परिषदेचे सभापती रामराजे नाईक-निंबाळकर ( MLC Chairman Ramraje Nimbalkar ) यांनी दिले आहे.
काही दिवसांपूर्वी गृहनिर्माण मंत्री जितेंद्र आव्हाड ( Minister Jitendra Awhad ) यांनी म्हाडाची घरे हस्तांतरीत न झाल्याप्रकरणी प्रश्न उपस्थित केला होता. त्यावर आज ( सोमवार ) विरोधी पक्षनेते प्रविण दरेकर यांनी विधान परिषदेत लक्षवेधीच्या माध्यमातून प्रश्न उपस्थित केला. त्यानंतर सभापती निंबाळकर यांनी महापालिका आयुक्त जाधव यांना पदावरून हटवून त्यांची चौकशी करण्याचे आदेश दिले आहेत.
काय आहे प्रकरण?
एक एकरहून अधिक क्षेत्रावरील बांधकामातील वीस टक्के बांधकाम आर्थिक दुर्बल घटकांसाठी म्हाडाला वर्ग करण्याचा नियम आहे. महानगरपालिकेने त्याचे उल्लंघन केले. यासंदर्भात म्हाडाने लिहिलेल्या पत्रांना महानगरपालिकेने केराची टोपली दाखविली. त्यानंतर आता विधान परिषदेचे सभापती रामराजे निंबाळकर यांच्या अध्यक्षतेखालील समितीकडून चौकशीसह महापालिका आयुक्त कैलास जाधव यांच्या बदलीचे आदेश दिले आहे.
