नाशिक - शहरातील मोहम्मदिया सोशल ग्रुपने देवळाली गावात मालेगावच्या डॉक्टरांना पाचारण करत तीन दिवसांच्या आरोग्य शिबिराचे आयोजन केले आहे. तसेच शहरातील वडाळा, जुने नाशिक, पंचवटी या भागात देखील नागरिकांची तपासणी सुरू आहे. या उपक्रमाअंतर्गत 2500 जणांची तपासणी करण्यात आली असून त्यांच्यावर उपचार झाले आहेत. सर्दी, खोकला, तापाची कमी प्रमाणात लक्षणे असल्यास त्या रुग्णाला 'मंसुरा काढा' देण्यात येतोय.
दिवसेंदिवस मालेगावातील कोरोनाबाधितांच्या संख्येत भर पडत होती. मात्र, कोरोनाच्या प्रसारावर नियंत्रण मिळवण्यासाठी स्थानिक पातळीवर मदतीचा हात पुढे आला. जिल्हा प्रशासनाच्या मदतीने स्थनिक डॉक्टरांनी यासाठी पुढाकार घेतला. त्यामुळे नागरिकांमध्ये रोगप्रतिकारक शक्ती वाढवण्यासाठी मालेगावात प्रयत्न यशस्वी झाल्याचे डॉक्टरांनी सांगितले आहे. एकेकाळी मालेगावातील बाधितांच्या आकड्यामुळे प्रशासन चिंतेत होते. मात्र, काही दिवसांनंतर मालेगावातील आकडा ओसरला आणि मुख्य शहरात बाधितांची संख्या वाढली. सध्या नाशिक शहरात दररोज १५० ते २०० नवे पॉझिटिव्ह सापडत आहेत. शहरातील एकूण कोरोनाबाधितांचा आकडा 4 हजारावर जाऊन पोहोचला असून 188 जणांचा आजवर मृत्यू झाला आहे.
'मंसुरा काढा'
मालेगावात कोरोनाबाधितांचा आकडा कमी होण्यामागचे रहस्य मंसूर काढ्यात असल्याचे म्हटले जाते. या काढ्याचा वापर रोगप्रतिकारक शक्ती वाढवण्यासाठी झाला आहे. मालेगावात कोरोनाबाधितांची संख्या झपाट्याने वाढत असताना याच काढ्याचा वापर डॉक्टरांनी करण्यास सांगितले. त्यामुळे रोगप्रतिकारक शक्ती वाढण्यास मदत झाली. या मंसुरा युनानी काढ्याला नाशिक, पुणे, मुंबईतून मोठी मागणी आहे.
मालेगावात 138 कोरोनाबाधित -
एप्रिल आणि मे 2020 मध्ये मालेगावात कोरोनाने हाहाकार माजवला होता. त्यावेळी नाशिक शहरात कोरोनाबाधितांची संख्या अत्यल्प होती. मात्र, मालेगावातील झपाट्याने वाढणारी संख्या प्रशासनाला आव्हान देत होती. आता नाशिक शहरात मागील महिन्यात बाधितांचा आकडा सात पटीने वाढला असून मालेगावात 138 रुग्ण उरले आहेत. शहरात 1 हजार 503 रुग्ण वेगवेगळ्या हॉस्पिटलमध्ये उपचार घेत आहेत.
