पुणे - पुणे शहरात सध्या माजी नगरसेवक चमकोगिरीचा कहर करताना दिसत आहेत. सुरुवातीला सॅलिसबरी पार्कला स्थानिक नगरसेवक श्रीनाथ भिमाले यांनी आपल्या परिजनाचे नाव दिले आणि आता तर थेट कहरच करण्यात आला. महात्मा फुले वाड्याच्या कमानीला भाजपचे माजी नगरसेवक विष्णू हरिहर यांच्या मातोश्रीचे नाव देण्याचा धक्कादायक प्रकार पुण्यात घडला. हा प्रकार समोर येताच महात्मा फुले समता परिषदेच्या कार्यकर्त्यांनी आक्रमक होत हा फलक त्या कमानीवरून खाली उतरवला आहे.
हेही वाचा - Sharad Pawar In Pune : ...म्हणून शरद पवारांनी घेतले दगडूशेठ गणपतीचे बाहेरुन दर्शन
महात्मा फुले वाड्याच्या मुख्य प्रवेशद्वारावर भाजपच्या माजी नगरसेविका विजयलक्ष्मी हरिहर यांच्या सासू लक्ष्मी हरिहर यांच्या नावाचा फलक लावण्यात आला होता. त्याखाली मार्गदर्शक म्हणून खासदार गिरीश बापट, आमदार मुक्ता टिळक यांचे नाव टाकण्यात आले होते, तर संकल्पना म्हणून महापौर मुरलीधर मोहोळ यांचे नाव टाकण्यात आले होते. मात्र, समता परिषदेच्या कार्यकर्त्यांनी हा फलक हटवल्यानंतर पुण्यात आता ऐतिहासिक वास्तू, मैदान, उद्यान यांना स्थानिक नगरसेवकांच्या नातेवाईकांचे नाव देण्याचा हा प्रकार पुन्हा एकदा प्रकर्षाने समोर आला आहे.
हा प्रकार आम्हाला 7 ते 8 दिवसांपूर्वीच लक्षात आला. याबाबत आम्ही प्रशासनाला माहिती देखील दिली. आणि जे कोणी माजी नगरसेवक आहेत त्यांना संपर्क देखील केला, पण तरीही तो काढण्यात आला नाही, म्हणून आज आम्ही समता परिषदेच्या कार्यकर्त्यांनी हा बोर्ड काढला आहे. हे आमचे मंदिर असून या ठिकाणी आम्हाला ऊर्जा मिळते. या वास्तूला अशा पद्धतीने नाव देणे चुकीचे असून याचा निषेध म्हणून आज आम्ही हा फलक काढला आहे, असे यावेळी समता परिषदेच्या कार्यकर्त्यांनी सांगितले आहे.
मध्यंतरी जेव्हा सैलसबरी पार्क येथे भाजप नगरसेवक श्रीनाथ भिमाले यांनी जेव्हा उद्यानाला वडिलांचे नाव दिले होते तेव्हा भाजप खासदार गिरीष बापट यांनी यावर जाहीर नाराजी व्यक्त केली होती. अस असताना देखील अशा पद्धतीने भाजप नगरसेवकाकडून उद्याने, रस्ते यांना घरच्या मंडळींची नावे देण्याचे प्रकार थांबताना दिसत नाही.
हेही वाचा - President Kovind Pune Tour : गणेशोत्सव साजरा करण्यात दगडूशेठ यांचा टिळकांशी संबंध - राष्ट्रपती
