नागपूर - राज्यात काँग्रेस प्रदेशाध्यक्ष पदी नाना पटोले यांची वर्णी लागल्याने काँग्रेसला एक आक्रमक आणि धडाडीचा चेहरा मिळाला आहे. त्यामुळे पक्षामध्ये उर्जितावस्था निर्माण होईल. मात्र, या निवडीनंतर राज्य सरकारमध्ये फेरबदल होण्याच्या चर्चांना उधान आले आहे. नाना पटोले आणि नितीन राऊत यांनी दिल्लीत सोनिया गांधी व राहुल गांधी यांची भेट घेतली त्यानंतर नितीन राऊत यांना राज्याचे उपमुख्यमंत्रीपद मिळण्याची शक्यता व्यक्त करण्यात येत आहे. तसचे नितीन राऊतांचे उर्जामंत्री पद नाना पटोले यांच्याकडे सोपवण्यात येणार असल्याचीही चर्चा रंगू लागली आहे.
राष्ट्रवादीकडे उपमुख्यमंत्री पद-
सध्या महाविकास आघाडीतील मंत्रिपदाचा कोठा पूर्ण झालेला आहे. तर दुसरीकडे पटोले यांना उर्जा खाते देण्याची चर्चा रंगू लागली आहे, अशा परिस्थितीत नितीन राऊत यांना उपमुख्यमंत्री करायचे झाल्यास त्यांच्याकडे कोणते खाते देण्यात येईल याबाबत अद्याप कोणतीही माहिती पुढे आलेली नाही. तसेच सध्या राज्याचे उपमुख्यमंत्री पद हे राष्ट्रवादीचे नेते अजित पवार यांच्याकडे आहे, असे असताना राष्ट्रवादी या पदावरचा दावा सोडणे अशक्यच आहे. तसेच ते दुसरा उपमुख्यमंत्री नक्कीच होऊ देणार नाहीत. किंबहुना त्यांची नाराजी ओढवून घेणे हे महाविकास आघाडीत बिघाडी निर्माण होण्यास कारणीभूत ठरेल.
एका पेक्षा जास्त उपमुख्यमंत्री होणार का? राऊतांना कोणते मंत्रालय?
बदलत्या राजकीय परिस्थितीनुसार उपमुख्यमंत्री पद मिळावे, यासाठी काँग्रेसचे जोरदार प्रयत्न सुरू आहेत. तसे झाल्यास राज्यात आंध्रप्रदेश, कर्नाटकच्या धर्तीवर एका पेक्षा जास्त उपमुख्यमंत्री पद अस्तित्वात येतील. नवनियुक्त प्रदेशाध्यक्ष नाना पटोले मंत्रिमंडळात येण्यास उत्सुक आहेत. पटोले यांना मंत्री करायचे झाल्यास काँग्रेसच्याच एका मंत्र्याला राजीनामा द्यावा लागेल. राजीनामा दिलेला मंत्री नाराज होऊ नये म्हणून त्यांच्याकडे विधानसभा अध्यक्षपदाची जबाबदारी देण्याचा पर्याय काँग्रेसकडे खुला आहे. यात उर्जा मंत्री नितीन राऊत यांच्यासह आदिवासी विकास मंत्री के.सी. पाडवी यांची नावे आघाडीवरती आहेत. मात्र, हे दोन्ही मंत्री अध्यक्षपद कितपत स्वीकारतील याबाबत शंका व्यक्त केली जात आहे.
विधानसभा अध्यक्ष पद शिवसेनेकडे सोपविण्याचा पर्याय?
नाना पटोले यांनी विधानसभा अध्यक्षपदाचा राजीनामा दिल्यानंतर रिक्त झालेल्या विधानसभेच्या अध्यक्षपदावर कोणाची वर्णी लागणार हा प्रश्न देखील अद्याप गुलदस्त्यातच आहे. अर्थसंकल्पीय अधिवेशन तोंडावर असताना अध्यक्षपदाची निवड तत्काळ होण्याची शक्यता आहे. तसेच राष्ट्रवादी काँग्रेसने अध्यक्षपद काँग्रेसकडेच राहील, अशी भूमिका यापूर्वीच स्पष्ट केली आहे. मात्र, जर राजकीय वर्तुळातील चर्चेनुसार काँग्रेसला जर उपमुख्यमंत्री पद पाहिजे असल्यास त्यांना अध्यक्षपदावर पाणी सोडावे लागेल. त्यामुळे हे अध्यक्षपद शिवसेनेकडे जाण्याची शक्यता आहे. तसे संकेतही शिवसेनेकडून देण्यात आले आहेत. शिवसेनेने यापूर्वी आपल्या कोठ्यातील कॅबिनेट मंत्री पद राष्ट्रवादी काँग्रेसला देऊ केले आहे. त्यामुळे शिवसेनेचा अध्यक्षपदावरचा दावा आणखी मजबूत होतो.
तर पटोलेंना प्रदेशाध्यक्ष पदावरच मानावे लागणार समाधान-
पटोले यांना राज्यमंत्रिमंडळात येण्याची ईच्छा आहे. मात्र, महाविकास आघाडीत दुसरे उपमुख्यमंत्री पद निर्माण करण्यास शिवसेना आणि राष्ट्रवादीने विरोध केल्यास पटोलेंचा मंत्रिमंडळातील समावेशाला ब्रेक लागू शकतो. शिवाय विद्यमान काँग्रेसच्या मंत्र्यांनी राजीनामा देऊन विधानसभा अध्यक्षपद स्वीकारण्यास नकार दिला तरी पटोले यांचे मंत्रि होण्याचे स्वप्न अपुरे राहू शकते, अशा मध्ये पटोलेंना पूर्णवेळ प्रदेशाध्यक्ष म्हणून संघटनेचे काम करण्याचे आदेश देण्यात येऊ शकतात. तर दुसरीकडे विधानसभा अध्यक्षपदासाठी आणखी एका चेहऱ्याला काँग्रेसकडून संधी दिली जाऊ शकते. एक व्यक्ती एक पद देत नाराजांची नाराजी दूर करण्याचाही प्रयत्न पक्षाकडून केला जाऊ शकतो.
विधानसभा अध्यक्षपदासाठी ही नावे आहेत चर्चेत-
नाना पटोलेंना प्रदेशाध्यक्ष केल्यानंतर आता विधानसभा अध्यक्षपदावर काँग्रेसच्याच नेत्यांची वर्णी लागल्यास माजी मुख्यमंत्री पृथ्वीराज चव्हाण, के सी . पाडवी, संग्राम थोपटे, नितीन राऊत, या नावांची चर्चा सध्या सुरू आहे.
