नागपूर - येथील (आरएसएस) राष्ट्रीय स्वयंसेवक संघाच्या रेशीमबाग परिसरातील डॉ. हेडगेवार स्मृती भवन परिसराची रेकी करणारा दहशतवादी संघटना जैश ए मोहम्मदचा रईस अहमद असादउल्ला शेख याला महाराष्ट्र दहशतवाद विरोधी पथकाच्या नागपूर युनिटने चौकशीसाठी ताब्यात घेतले आहे. जम्मू-काश्मीर पोलिसांकडून रईस अहमद असादउल्ला शेखचा ताबा प्रोडक्शन वॉरंट वर घेण्यात आला आहे.
कधी केली रेकी - रईस अहमद असादउल्ला शेखने गेल्यावर्षी जुलै महिन्यात नागपुरात येऊन डॉ. हेडगेवार स्मृती भवन परिसर तसेच नागपुरातील इतर काही महत्त्वाच्या ठिकाणांची रेकी केल्याची माहिती होती. त्यानंतर रईस अहमदला जम्मू-काश्मीरमध्ये काश्मीर पोलिसांकडून अटक करण्यात आली होती. त्यांच्या चौकशीत रईसने पाकिस्तानमधील जैशच्या हँडलरच्या आदेशावरून नागपुरात रेकी केल्याचे समोर आले होते. त्यानंतर नागपूर पोलीस दलातील काही वरिष्ठ अधिकाऱ्यांनीही काश्मीरमध्ये जाऊन त्याची चौकशी केली होती.
तपासात धक्कादायक खुलासे होणार - आता पुढील तपासासाठी एटीएसच्या नागपूर युनिटने रईसचा ताबा घेतला आहे. नागपुरात तो कोणाच्या सांगण्यावरून आला होता आणि त्याने नागपुरात राष्ट्रीय स्वयंसेवक संघाच्या इमारतीची कुठून आणि कशी रेकी केली. तसेच कोण कोणती माहिती त्यांनी पाकिस्तान मधील आपल्या हँडलर पुरवली याचा तपास सुरू केला आहे.जानेवारीमध्ये झाला होता रेकीचा खुलासा - नागपुरातील काही संवेदनशील ठिकाणांची पाकिस्तान पुरस्कृत दहशतवादी संघटना जैश ए मोहम्मदकडून रेकी करण्यात आल्याची (RSS headquarters targeted by terrorists) खळबळजनक माहिती ७ जानेवारीला समोर आली. नागपूरचे पोलीस आयुक्त अमितेश कुमार यांनीही त्यास दुजोरा दिला होता. सेंट्रल एजन्सीकडून पोलिसांना ही माहिती मिळाल्यानंतर पोलिसांनी नागपुरात राष्ट्रीय स्वयंसेवक संघाचे महाल परिसरातील मुख्यालयासह Rashtriya Swayamsevak Sangh (RSS) रेशीम बागमधील संघाच्या डॉ. हेडगेवार स्मृती मंदिर परिसर आणि इतर काही संवेदनशील ठिकाणांच्या सुरक्षेचा आढावा घेऊन तिथे सुरक्षा व्यवस्था कडक करण्यात आली होती.
जुलै २०२१ मध्ये नागपुरात होता अतिरेकी - नागपूरमध्ये हा अतिरेकी २०२१ मध्ये आला होता. तो दोन दिवस नागपूरमध्ये राहिला असल्याची ही माहिती पोलिसांना मिळाली होती. हेडगेवार स्मारकाच्या बाजूला असलेल्या मैदानाचे काही फोटो त्याने घेतले होते अशीही माहिती त्यावेळी मिळाली होती. तसेच शहरातील बर्डी परिसरातील एका लॉजवर तो राहिला होता. याचीही माहिती पोलिसांना तपासामध्ये मिळाली होती. डिसेंबरमध्ये त्याला जम्मूतून अटक करण्यात आली होती. त्यावेळी त्याच्याकडे हातबाँब सापडला होता. त्यावेळी केलेल्या चौकशीत त्याने नागपूरमध्ये रेकी केल्याची माहिती दिली होती. तसेच ही माहिती मिळाल्यानंतर नागपूरमध्ये हाय अलर्ट जारी करुन संबंधित परिसरांमध्ये अनेक प्रतिबंध घालण्यात आले होते.
