नागपूर - भाजपच्या नेत्यांना अडचणीत आणणारे वकील सतीश उके यांच्यामागे ईडीचा ससेमिरा लागला आहे. वकील सतीश उके यांना सकाळी ताब्यात घेतल्यानंतर दिवसभर ईडी अधिकाऱ्यांनी सेमिनरी हिल्समधील सीजीओ कार्यालयात चौकशी केली आहे. वकील सतीश उके व त्यांच्या भावाला अटक केली आहे.
आता उके यांना नागपूर जिल्हा विशेष न्यायालयात नेण्यात येणार आहे. ईडीचे अधिकारी नागपूर जिल्हा सत्र न्यायालयात दाखल झाले आहेत. न्यायालयातून ट्रान्झिट रिमांड मिळविण्याचा ईडी अधिकाऱ्यांचा प्रयत्न असणार आहे. वकील सतीश उके आणि त्याच्या भावाला विमानाने मुंबईला रात्री नेण्याची शक्यता आहे.
पहाटेच घरावर टाकला छापा-
भारतीय जनता पक्षाच्या अनेक मोठ्या नेत्यांवर विविध आरोप करून त्यांच्या विरुद्ध न्यायालयात याचिका दाखल करणारे काँग्रेस पुरस्कृत वकील सतिश उके यांच्या नागपुरातील निवासस्थानी आज पहाटे अमलबजावणी संचालनालय (ईडी) च्या पथकाने छापा टाकला आहे. ईडीने दोघांची पाच तास चौकशी केली. त्यानंतर त्याचा भाऊ प्रदीप आणि त्यांना ताब्यात घेऊन नागपूर ईडी कार्यालयात नेण्यात आलं आहे. पथकाने सतीश उके यांचा मोबाईल आणि लॅपटॉप सुद्धा जप्त केला आहे. पथकात सुमारे दहा ते 12 अधिकारी ईडीच्या पथकात सहभागी असून यामध्ये दोन महिला अधिकाऱ्यांचा देखील समावेश असल्याचं बोललं जातं आहे. ईडीने छापा टाकताच सीआरपीएफच्या जवानांचा बंदोबस्त उकेच्या घराबाहेर तैनात करण्यात आला आहे.
जमीन व्यवहारातुन ईडीचा छापा -वकील सतीश उके यांनी गैरमार्गाने काही जमिनी बळकावल्याचा त्यांच्यावर आरोप आहे. यासंदर्भात अजनी पोलीस ठाण्यात सतीश उके विरुद्ध गुन्हा सुद्धा दाखल आहे. याआधी नागपूर क्राईम ब्रांचने देखील उके आणि त्यांच्या भावाला चौकशीसाठी ताब्यात घेतले होते.
हेही वाचा - ED Raid in Nagpur : कोण आहे वकील सतीश उके? 'या' प्रकरणांमध्ये उके यांची महत्त्वाची भूमिका
नानांचा मोदी शोधणारे उके - काही महिन्यांपूर्वी प्रधानमंत्री नरेंद्र मोदी यांच्या संदर्भात आक्षेपार्ह वक्तव्य केल्याचा आरोप काँग्रेस प्रदेशाध्यक्ष नाना पटोले यांच्यावर करण्यात आला होता. नानांनी ज्या मोदी संदर्भात वक्तव्य केलं होतं ते मोदी पंतप्रधान नसून गावगुंड मोदी असल्याचा दावा नानांनी केला होता. त्यानंतर त्या गावगुंड मोदीला शोधुन मीडिया समोर आणण्याचं काम देखील सतीश उके यांनीच केले होते.
पाच तास चौकशी - ई़डीने छापा टाकल्यानंतर उके यांची पाच तास चौकशी केली. त्यानंतर उके यांचा भाऊ प्रदीप आणि त्यांनी ताब्यात घेतले आहे.
