नागपूर - टीव्हीवरील क्राईम पेट्रोलचे शो बघून एका महिलेने आपल्या प्रियकराच्या मदतीने नवऱयाचाच काटा काढण्याचा प्रयत्न केल्याची खळबळजनक घटना नागपूर शहरातील गिट्टीखदान पोलीस ठाण्यात घडली आहे. राजश्री डेकाटे असं त्या महिलेचं नाव आहे. पोलिसांनी या घटनेचा बारकाईने तपास केल्यानंतर हा धक्कादायक खुलासा झाला आहे.
दोन डिसेंबरच्या रात्री नागपूरच्या गिट्टीखदान पोलीस स्टेशन अंतर्गत डेकाटे दाम्पत्यावर प्राणघातक हल्ल्या झाला होता. या घटनेत राजश्री डेकाटे या किरकोळ जखमी झाल्या होत्या, तर त्यांचे पती राकेश मात्र गंभीर जखमी झाले होते. या घटनेची तक्रार दाखल झाल्यानंतर राजश्री यांची वागणूक संशयास्पद वाटत असल्याने पोलिसांनी त्यांचा मोबाईल ताब्यात घेऊन तपास केला असता संपूर्ण प्रकार समोर आला आहे. पोलिसांनी राजश्री आणि तिचा प्रियकर रजत सोमकुवर याला अटक केली आहे.
पोलिसांनी दिलेल्या माहितीनुसार, दोन डिसेंबरच्या रात्री राकेश आणि राजश्री डेकाटे हे दोघे राजश्री यांच्या माहेरातून नागपूरला परतत असताना गोरेवाडा परिसरात राजश्री यांनी ओकारी आल्याचे कारण सांगून राकेश यांना दुचाकी थांबवायला लावली. त्याच वेळी चेहरा झाकलेल्या हल्लेखोराने राजश्री आणि राकेश यांच्यावर हल्ला केला. राजश्रीला किरकोळ मारहाण केल्यानंतर हल्लेखोराने हातातल्या हत्याराने राकेश यांची हत्या करण्याचा प्रयत्न केला. त्यानंतर आरोपी हा राकेश यांना गंभीर जखमी अवस्थेत सोडून पळून गेला. राजश्री यांनी घटनेच्या अनेक तासानंतर गिट्टीखदान पोलीस स्टेशनमध्ये पतीवरील हल्ल्याची तक्रार दिली. घटनेचे गांभीर्य ओळखून पोलिसांनीही जोरात तपास सुरु केला. मात्र, हल्लेखोराने डेकाटे दांपत्त्यांकडून कोणतीही लूट केली नव्हती. त्यामुळे हल्ल्याचा उद्दिष्ट नेमका काय हे पोलिसांना स्पष्ट होत नव्हते.
आरोपींना पोलिसांनी केली अटक
पोलिसांना जखमी राकेश यांच्या पत्नीच्या वर्तवणुकीवर शंका आल्यामुळे तिचा मोबाईल फोन ताब्यात घेतला. त्याच्यातील गेल्या अनेक महिन्यांचा डिलीटेड डाटा पुन्हा मिळवला. त्यात राजेश यांच्या पत्नी राजश्रीचे एका रजत सोमकुंवर नावाच्या व्यक्तीसोबत प्रेम संबंध असल्याचे समोर आले. पोलिसांनी रजत सोमकुंवर याला ताब्यात घेतले असता, त्यानेच राजश्रीच्या सांगण्यावरून राकेश डेकाटेला संपवण्यासाठी हल्ला केल्याचे कबूल केले. पोलिसांनी रजत सोमकुंवर आणि राजश्री डेकाटे या दोघांना हत्येच्या प्रयत्नाच्या प्रकरणात अटक केली आहे.
असा रचला राकेशच्या खुनाचा कट
रजत आणि राजश्री यांचे गेले सहा वर्षांपासून प्रेम संबंध होते. मात्र, राजश्रीचे लग्न राकेश सोबत झाले. नेहमीच क्राईम पेट्रोल सारख्या गुन्हे विषयक मालिका पाहणाऱ्या राजश्री यांना आपल्या प्रेमीला पुन्हा प्राप्त करण्यासाठी युक्ती सुचली आणि तिने रजतला राकेशचा खून करण्यास तयार केले. कोणाला शंका येऊ नये त्यासाठी राजश्री पती राकेशला घेऊन माहेरी गेली आणि तिथून रात्री उशिरा नागपुरात परतत असताना नागपूरच्या वेशीवर ओकारी आल्याचे सोंग करत निर्जन ठिकाणी अंधारात दुचाकी थांबवायला लावली. तिथेच दबा धरून बसलेल्या रजतने राकेशवर हल्ला केला. राकेशचे नशीब बलवत्तर असल्याने गंभीर जखमी होऊनही त्याचा जीव वाचला.
