नागपूर - काँग्रेस नेते अशोक चव्हाण यांनी आज नागपूर येथे पत्रकार परिषद घेतली. परिषदेत त्यांनी कर्नाटकमधील आमदारांचा राजीनामा प्रकरण आणि वंचित बहुजन आघाडीबाबत भाष्य केले. यावेळी त्यांनी भाजपवर कडाडून टीका केली.
अशोक चव्हाण म्हणाले, भाजप संपूर्ण देशात फोडाफोडीचे राजकारण करण्याचा प्रयत्न करत आहे. कर्नाटकमध्ये सुरू आहे ते योग्य नाही. भाजपने देशाच्या लोकशाहीला काळिमा फासण्याचा प्रयत्न केला आहे. निवडून आलेल्या सरकारला अस्थिर करण्याचा प्रयत्न भाजपकडून सुरू आहे. त्यांची ही भूमिका योग्य नाही. भाजपकडून चाललेल्या या प्रयत्नांना हाणून पाडण्यासाठी काँग्रेसने एकजुटीने राहायला पाहिजे. काँग्रेसकडून भाजपला चोख उत्तर दिले जाईल.
काँग्रेसमधील राजीनामा सत्रावर बोलताना चव्हाण म्हणाले, लोकसभेनंतर राजीनामा दिला जात आहे, हे योग्यच आहे. जिम्मेदारी घेण्याचा हा प्रयत्न आहे. नवीन अध्यक्षाची नियुक्ती झाल्यानंतर काँग्रेस जोमाने कामाला लागेल.
वंचित बहुजन आघाडीबाबत काँग्रेसची भूमिका स्पष्ट करताना चव्हाण म्हणाले, वंचितकडून परस्पर भूमिका मांडल्या जात आहेत. त्यामुळे प्रकाश आंबेडकर यांनी त्यांची भूमिका स्पष्ट करावी. काँग्रेस वंचितसोबत आघाडीसाठी तयार आहे.
