मुंबई - मुंबईमधील दादर हे सर्वाधिक वर्दळीचे ठिकाण म्हणून ओळखले जाते. या परिसरात नेहमीच गर्दी असते. सणासुदीला दादर पश्चिमेकडे पाय ठेवायलाही जागा नसते. अशा गर्दीच्या ठिकाणी वाहन पार्किंग करणे डोकेदुखी ठरते. ही समस्या दूर करण्यासाठी आता येथे 'वॅलेट' पार्किंगची सुविधा उपलब्ध केली जाणार आहे. व्यापारी संघ व महापालिकेने या उपक्रमासाठी पुढाकार घेतला आहे. पार्किंगसाठी चार तासांसाठी १०० रुपये तर पुढील एक तासासाठी २५ रुपये शुल्क आकारण्यात येणार आहे. सकाळी ११ ते रात्री १० पर्यंत ही सुविधा असणार आहे. त्यामुळे आता वाहन पार्क करून शॉपिंग आदी कामे बिनधास्त करता येणार आहे.
वॅलेट पार्किंग - दादर पश्चिम परिसर नेहमीच गर्दीने गजबजून गेलेला असतो. मध्यवर्ती ठिकाण तसेच नाट्य, सिनेमागृह, विविध प्रकारची चवदार पदार्थांची हॉटेल्स व मुख्य म्हणजे विविध वस्तूंसाठी फेमस असलेला बाजार, लगीन सराई व सणासुदीच्या खरेदीसाठी होणारी गर्दी या परिसरात असते. अशा गर्दीच्या ठिकाणी पाय ठेवायला जागा नसतो. त्यामुळे वाहन चालकांना वाहन पार्किंग करण्यासाठी जागाच शिल्लक राहत नाही. ही बाब लक्षात घेऊन महापालिका व व्यापारी संघाने येथे वॅलेट पार्किंग ( Pay and Park )ची सुविधा उपलब्ध करण्याचा निर्णय घेतला आहे. दादर व्यापारी संघातर्फे ऑगस्ट ते दिवाळीमध्ये अशी पार्किंग योजना राबविण्यात आली होती. त्यास नागरिकांकडून उत्तम प्रतिसाद मिळाला होता. त्यामुळे ही योजना राबविण्यात येणार आहे. प्लाझा चित्रपटगृहाजवळ या योजनेचा शुभारंभ करण्यात आला. त्यामुळे येथील चवदार हॉटेलमधील पदार्थांचा आस्वाद घ्यायचा असेल, नाटक, सिनेमा तसेच बाजारात खरेदी व अन्य स्थळांना भेटी द्यायच्या असल्यास आपले वाहन येथील पार्किंगमध्ये पार्क करून बिनधास्त फिरता येणार आहे. चार तासासाठी १०० रुपये व त्यापुढील एका तासासाठी २५ रुपये मोजावे लागणार आहे.
कंपनीचे चालक गाडीची ने-आण करणार - डिजिटल अँड्राईड अॅप पद्धतीने 'पार्क प्लस' या कंपनीच्या सहकार्याने ही योजना राबवली जाणार आहे. दादरमधील व्यावसायिक, ग्राहक नाट्यगृह, सिनेमागृह, हॉटेल्स, डॉक्टर, कार्यालयीन कर्मचारीही या योजनेचा वापर करू शकणार आहेत. दादर पश्चिम परिसरात जिथे असाल तेथून पार्क प्लस कंपनीद्वारे आपले चारचाकी वाहन त्यांच्या चालकांकडून शिवसेना भवनसमोरील कोहिनूर वाहनतळात पार्क केले जाईल. आपले काम, शॉपिंग, नाटक संपण्याच्या आधी निर्धारित वेळेत ते पुन्हा जागेवर आणून देतील, अशी माहिती पालिकेच्या दादर जी उत्तर विभागाचे सहायक आयुक्त किरण दिघावकर यांनी दिली.
येथे असणार वॅलेट पार्किंग सुविधा - कोतवाल उद्यान, आयसीआयसी बॅंक, जिप्सी कॉर्नरच्या समोर, एस.के. बोले रोड, ज्योती हार्डवेअर, रानडे रोड सर्वोदय सोसायटी.
हेही वाचा - Shared An Inspiring Post : आयएएस अधिकाऱ्याने शेअर केली रस्त्यावरील दिव्यांग विक्रेत्याची प्रेरणादायी पोस्ट
