मुंबई - मुंबईत बोरिवली येथे आग लागण्याची तर चेंबूर भीम नगर येथे दरड कोसळण्याची घटना घडली आहे. आगीच्या घटनेत कोणीही जखमी झालेले नाही तर दरड कोळण्याच्या घटनेत दोघे जखमी झाले आहेत. त्यांची प्रकृती गंभीर असल्याची माहिती पालिकेच्या आपत्कालीन व्यवस्थापन विभागाकडून देण्यात आली आहे.
दरड कोसळून दोघे गंभीर - चेंबूर येथील भीम नगर, आरसीएफ वाशी नाका येथे सकाळी 6 वाजता दरड कोसळली. डोंगरावर असलेल्या घरावर दरड कोसळली. या दुर्घटनेत दोघे जखमी झाले. अरविंद प्रजापती (वय 25 वर्षे), आशिष प्रजापती (वय 20 वर्षे), अशी जखमींची नावे असून त्यांना सायन रुग्णालयात दाखल करण्यात आले आहे. या दोघांची प्रकृती गंभीर असल्याची माहिती रुग्णालय प्रशासनाकडून देण्यात आली आहे.
बोरिवलीला आग - धीरज टवे रा टॉवर, राम नारायण ठाकूर रोड, सिद्धार्थ नगर, बोरिवली पूर्व येथे मध्यरात्री 12.30 च्या सुमारास आग लागली. तळ अधिक पंधरा मजली इमारतीच्या 13, 14 आणि 15 व्या मजल्यावरून धूर पसरला होता. अग्निशमन दलाने तातडीने धाव घेवून पहाटे 4.45 वाजता आगीवर नियंत्रण मिळवले. या दुर्घटनेत कोणीही जखमी झालेले नाही.
हेही वाचा - मुंबई : विद्युत वाहनांना 'अच्छे दिन'.. पालिका, बेस्टकडून चार्जिंग स्टेशन उभारण्यास सुरुवात
