मुंबई - राज्यात कोरोना विषाणूची दुसरी लाट ओसरत असतानाच डेल्टा प्लस विषाणूच्या प्रसाराला सुरुवात झाली आहे. राज्यात आतापर्यंत डेल्टा प्लसचे ६६ रुग्ण आढळून आले आहेत. त्यापैकी अर्ध्याहून अधिक म्हणजे ३६ रुग्ण हे जळगाव, रत्नागिरी, मुंबई या तीन जिल्ह्यात आढळून आले आहेत. विशेष म्हणजे एकूण आढळून आलेल्या रुग्णांपैकी लसीचे डोस घेतलेल्या १८ जणांना डेल्टा प्लसची लागण झाली आहे. आतापर्यंत डेल्टा प्लसमुळे ५ जणांचा मृत्यू झाला आहे. यामुळे आरोग्य विभाग सतर्क झाला आहे. राज्यातील नागरिकांनी कोविड त्रिसूत्रीचे पालन करावे, जागृत रहावे, असे आवाहन आरोग्य मंत्री राजेश टोपे यांनी केले आहे.
लस घेतलेल्या १८ जणांना डेल्टा प्लसची लागण -
आतापर्यंत राज्यात ६६ डेल्टा प्लस रुग्णांची नोंद झाली आहे. त्यापैकी ३२ पुरुष असून ३४ स्त्रिया आहेत. सर्वाधिक ३३ डेल्टा प्लस रुग्ण १९ ते ४५ वर्ष वयोगटातील आहेत. तर, त्या खालोखाल ४६ ते ६० वर्ष वयोगटातील १८ रुग्ण आहेत. यामध्ये १८ वर्षांखालील ७ बालके असून, ६० वर्षांवरील ८ रुग्ण आहेत. ६६ पैकी ३१ रुग्ण लक्षणे नसलेले किंवा सौम्य लक्षणे असलेले आहेत. यामुळे त्यांच्यावर घरातच उपचार सुरू आहेत. डेल्टा प्लसच्या ६६ रुग्णांपैकी कोरोना प्रतिबंधक लस घेतलेल्या १८ जणांना डेल्टा प्लसची लागण झाली आहे. १८ पैकी १० जणांनी लसीचे दोन डोस घेतले आहेत. तर, ८ जणांनी लसीचा एकच डोस घेतला आहे. लसीकरण झालेल्यांपैकी २ व्यक्तींनी कोव्हॅक्सिन तर इतर १६ जणांनी कोव्हिशिल्ड या लसीचे डोस घेतले होते.
५ रुग्णांचा मृत्यू -
६६ पैकी ५ रुग्णांचा मृत्यू झाला आहे. त्यात ३ पुरुष २ स्त्रिया आहेत. रत्नागिरी जिल्ह्यात २, बीड, मुंबई, रायगड येथे प्रत्येकी एका रुग्णाचा मृत्यू झाला आहे. मृत्यू झालेले पाचही रुग्ण ६५ वर्षांवरील असून, त्यांना अतिजोखमीचे आजार होते. मृत्यू झालेल्या २ जणांनी कोव्हिशिल्डचे डोस घेतले होते. २ जणांनी कोणतीही लस घेतली नव्हती. तर, एकाच्या लसीकरणाबाबत कोणतीही माहिती मिळालेली नाही.
सेंटीनल सर्वेक्षण, जिनोमिक सिक्वेन्सिंग -
राज्यातील ५ प्रयोगशाळा आणि ५ रुग्णालयांची निवड सेंटीनल सेंटर म्हणून करण्यात आलेली आहे. हे प्रत्येक सेंटीनल सेंटर दर पंधरवड्याला १५ प्रयोगशालेय नमुने जिनोमिक सिक्वेन्सिंगसाठी राष्ट्रीय विषाणू विज्ञान संस्था आणि राष्ट्रीय पेशी विज्ञान संस्था या पुणे स्थित असलेल्या संस्थांना पाठवते. जनुकीय क्रमनिर्धारण म्हणजेच, जिनोमिक सिक्वेन्सिंगला गती मिळावी म्हणून महाराष्ट्र शासनाने, कौन्सिल ऑफ सायंटिफिक अँड इंडस्ट्रीयल रिसर्च संस्थेअंतर्गत काम करणाऱ्या इन्स्टिट्यूट ऑफ जिनोमिक्स अँड इंटिग्रेटेड बायोलॉजी या प्रयोगशाळेसोबत करार केला असून, या नेटवर्कद्वारे दर महिन्याला प्रत्येक जिल्ह्यातून १०० प्रयोगशाळा नमुन्यांची तपासणी करण्यात येते, अशी माहिती आरोग्य विभागाने दिली.
'त्रिसूत्रीचे पालन करावे, जागृत रहा'
राज्यात डेल्टा प्लस व्हेरियंटचे ६६ रुग्ण आढळून आले आहेत. या व्हेरियंटचा प्रसार होऊ नये म्हणून आरोग्य विभागाकडून उपाययोजना केल्या जात आहेत. ज्या रुग्णांना या व्हेरियंटची लागण झाली आहे त्यांच्या गेल्या काही दिवसांतील माहिती गोळा केली जात आहे. ज्यामध्ये त्यांनी कोरोना प्रतिबंधात्मक लस घेतली होती का? त्यांना लागण कुठे झाली? याची माहिती घेतली जात आहे. या व्हेरियंटची लागण झालेल्या रुग्णाच्या संपर्कात आलेल्या हायरिक्स लोकांच्या चाचण्या केल्या जात आहेत. लसीचे दोन डोस घेतलेल्या १० आणि एक डोस घेतलेल्या ८ अशा एकूण १८ जणांना व्हेरियंटची लागण झाली आहे. त्यातील २ जणांनी कोवॅक्सीन तर इतरांनी कोव्हीशिल्ड लस घेतली होती. डेल्टा प्लसची लागण झालेल्या ५ रुग्णांचा मृत्यू झाला आहे. मात्र, या रुग्णांचे वय ६५ च्या वर असून, त्यांना इतरही आजार होते. यामुळे त्यांचा मृत्यू डेल्टा प्लसमुळे झाल्याचे म्हणणे योग्य ठरणार नाही, असे आरोग्य मंत्री राजेश टोपे यांनी सांगितले. डेल्टा प्लस व्हेरियंटची लागण होऊ नये म्हणून कोविड त्रिसूत्रीचे पालन करावे, जागृत रहावे असे आवाहनही आरोग्य मंत्र्यांनी यावेळी केले आहे.
कोणत्या जिल्ह्यात किती रुग्ण -
जळगाव १३
रत्नागिरी १२
मुंबई ११
ठाणे ६
पुणे ६
रायगड ३
पालघर ३
नांदेड २
गोंदिया २
चंद्रपूर १
अकोला १
सिंधुदुर्ग १
सांगली १
नंदुरबार १
औरंगाबाद १
कोल्हापूर १
बीड १
एकूण रुग्ण - ६६
