मुंबई - शाळांना सुट्टी असल्याने बच्चे कंपनीला घेऊन देशभरातील पालक मुंबईमधील पर्यटन स्थळाला भेटी देतात. त्याचप्रमाणे राणीबाग ( Rani Baug Mumbai ) आणि भाऊ दाजी लाड म्युझियमलाही भेट देतात. मात्र आठवड्याच्या मध्येच बुधवारी राणीबाग ( Rani Baug ) बंद ठेवली जात असल्याने पर्यटकांना परत फिरावे लागत आहे. यासाठी राणीबाग शाळांना सुट्ट्या असताना सुरु ठेवावी अशी मागणी पर्यटकांकडून केली जात आहे.
बुधवारी राणीबाग बंद - मुंबईत भायखळा येथे राणीबाग म्हणजेच वीरमाता जिजामाता भोसले उद्यान आणि प्राणी संग्रहालय आहे. सुमारे ५२ एकर जागेवर हे प्राणी संग्रहालय पसरले आहे. यात विविध प्राणी, पक्षी आणि दुर्मिळ झाडे आहेत. प्राणी, पक्षी पाहण्यासाठी बच्चे कंपनीला घेऊन पालक राणीबागेत येतात. त्याच प्रमाणे राज्यातून आणि देशभरातील पर्यटक राणीबागेत येतात. सुट्टीच्या दिवशी राणीबागेत पर्यटकांची गर्दी वाढलेली असते. सध्या उन्हाळ्याची शाळांना सुट्टी आहे, कोरोना कमी झाल्याने राणीबाग खुली करण्यात आली आहे. त्यामुळे पर्यटकांची रोज राणीबागेत गर्दी होत आहे. मात्र बुधवारी राणीबाग बंद असल्याने पर्यटकांना पुन्हा माघारी फिरावे लागत आहे. निदान शाळेच्या सुट्यांच्या दिवशी तरी राणीबाग सुरु ठेवावी अशी मागणी पर्यटकांकडून केली जात आहे.
भाऊ दाजी लाड संग्रहालय ( Bhau Daji Lad Museum )
राणीच्या बागेतले भाऊ दाजी लाड संग्रहालय या वास्तूची निर्मिती 2 मे 1872 मध्ये करण्यात आली होती. यापूर्वी या संग्रहालयाचे नाव व्हिक्टोरिया अँड अल्बर्ट म्युझियम असे होते. मात्र नंतर या वास्तूचे नामकरण मुंबईचे पहिले भारतीय शेरीफ व या संग्रहालयाच्या उभारणीत महत्त्वाची कामगिरी बजावणारे डॉ. भाऊ दाजी लाड यांच्या नावावरून ठेवण्यात आले. मुंबईतील हे अतिशय प्राचीन वस्तू संग्रहायल आहे. हे संग्रहालय 154 वर्ष जुने आहे, हे संग्रहालय सुरू झाले, तेव्हा हे संग्रहालय मुंबईतील पहिले व देशातले तिसरे संग्रहालय ठरले.
४३ हजार ७२८ पर्यटकांनी दिली भेट - कोरोनाच्या संकटामुळे मागील दोन वर्ष राणीबाग बंद ठेवण्यात आली होती. मात्र आता कोरोना आटोक्यात आल्याने निर्बंध हटवण्यात आले आहेत. त्यामुळे राणीबागेत मुंबईकर - पर्यटकांची गर्दी वाढली आहे. कोरोनामुळे दोन वर्ष राणीबागेच्या महसूलाला फटका बसला होता. मात्र आता गर्दी वाढत असल्याने महसूलात भर पडते आहे. सध्या मुलांना उन्हाळ्याची सुट्टी पडली आहे. त्यामुळे बच्चे कंपनीची राणीबागेत गर्दी वाढली आहे. शनिवारी, रविवारी सुट्टीचा दिवस असल्याने राणीबाग गजबजून जाते आहे. शनिवारी तब्बल १७, ६१७ लोकांनी राणीबागेला भेट दिली. त्यामुळे ६ लाख ५४ हजार १७५ रुपये इतका महसूल मिळाला. तर रविवारी २६१११ पर्यटकांनी भेट दिल्याने ९,४४,७२५ रुपये उत्पन मिळाले. त्यामुळे या दोन दिवसांत तब्बल ४३ हजार ७२८ पर्यटकांनी राणीबागेला भेट दिली. त्यामुळे १५ लाख ९८ हजार ९०० रुपये इतका महसूल मिळाला.
काय आहे राणी बागेत? - राणीची बाग ४८ एकरांच्या विस्तीर्ण परिसरात असलेल्या या उद्यान व प्राणिसंग्रहालयात अनेक वृक्ष, झाडी, प्राणी, पक्षी आदी आहेत. १९ नोव्हेंबर १८६२ रोजी उद्यान व प्राणिसंग्रहालय नागरिकांसाठी खुले करण्यात आले. १८ नोव्हेंबर २०२२ रोजी या घटनेला, उद्यान व प्राणिसंग्रहालयाला १६० वर्षे पूर्ण होणार आहेत. त्यानिमित्ताने वर्षभर वेगवेगळ्या कार्यक्रमातून उपक्रम राबविले जात आहेत. नवीन पक्ष्यांच्या नंदनवनात वॉक थ्रू सुविधेसह तयार केलेली प्रदर्शनी आहे. काचेच्या प्रदर्शन गॅलरीमधून आतील तयार करण्यात आलेले नैसर्गिक अधिवास, पक्ष्यांकरिता विविध झाडे-झुडपे, घरटी तयार करण्याच्या जागा, खेळणी, पाणी पिण्याच्या सुविधा इत्यादी पाहता येतात. युरोपियन तंत्रज्ञानावर आधारित स्टेनलेस स्टील वायरमेशची संरचना प्रदर्शनीच्या आच्छादनासाठी उभारण्यात आली आहे. या प्रदर्शनीमध्ये प्रामुख्याने धनेश, पोपट, सोनेरी तितर, मोर, कोकॅटिल, मिलिटरी मकाऊ, आफ्रिकन करडा पोपट आदी पाणपक्षी प्रदर्शित करण्यात आले. पर्यटकांना आकर्षित करणारे पेंग्निन तसेच वाघ, बिबट्या, कोल्हा आदी प्राणी राणीबागेत पाहायला गर्दी होत आहे.
नियमाने एक दिवस बंद ठेवणे बंधनकारक - गेल्या अनेक वर्षांपासून राणीची बाग दर बुधवारी बंद असते. सुट्टीच्या दिवशी प्राण्यांना थोडी मोकळीक मिळते. देखभाल, दुरुस्ती कामे, स्वच्छता वगैरे करण्यात येतात. सतत नागरिकांच्या सान्निध्यात असल्याने त्यांना थोडा तणावमुक्त जीवन जगता येते. पालिकेने वेबसाईटवर बुधवारी राणी बाग बंद असते, याची माहिती दिली आहे. आंतरराष्ट्रीय झू पार्क नियमांनुसार प्राणी संग्रहालय आठवड्यातून एक दिवस बंद ठेवणे बंधनकारक आहे. यापुढे नागरिकांना राणी बाग बुधवारी बंद असते, याबाबतची माहिती अधिक चांगल्या प्रकारे देण्याचा प्रयत्न करण्यात येईल असे राणीबागेचे संचालक डॉ. संजय त्रिपाठी यांनी सांगितले.
तारापूरवाला मत्सालयही बंद - मुंबईत चर्नीरोड येथील तारापोरवाला मत्स्यालयात दररोज हजारोंच्या संख्येने पर्यटक भेट देतात. करोना व्हायरसचा प्रादुर्भाव रोखण्याच्या उपायातंर्गत तारापोरवाला मत्स्यालय पर्यटकांसाठी बंद ठेवण्याचा निर्णय महाराष्ट्र शासनाने घेतला आहे. हे मत्सालय सरकारने सुरु करून पर्यटकांना दिलासा द्यावा अशीही मागणीही केली जात आहे.
हेही वाचा - भारत पाकिस्तान फाळणीत वेगळे झालेल्या बहिण-भावांची 75 वर्षानंतर भेट
