मुंबई - मास्क न लावणाऱ्याविरोधात मुंबई महापालिकेकडून दंडात्मक कारवाई करण्यात येत आहे. पण ही कारवाई म्हणावी तितकी व्यापक आणि तीव्र दिसत नाही. त्यामुळेच मुंबईत मास्क न लावता फिरणाऱ्यांची संख्या जास्ती आहे. त्यामुळेच कोरोना रुग्णांचीही संख्या वाढत आहे. त्यानंतर आता पालिकेला जाग आली आहे. पालिकेने मास्क न लावणाऱ्यांच्या मुसक्या आवळण्यासाठी उद्यापासून विशेष मोहीम हाती घेतली आहे. त्यानुसार उद्यापासून 24 वॉर्डमध्ये 15 जणांची टीम तैनात केली जाणार असून ही टीम मास्क न लावणाऱ्यांविरोधात दंडात्मक कारवाई करणार आहेत. त्याचवेळी दंडाची रक्कम 1 हजारवरून 200 रुपये करण्यात आल्याची माहिती पालिकेचे अतिरिक्त आयुक्त सुरेश काकाणी यांनी 'ईटीव्ही भारत'ला दिली आहे.
लोकांमध्ये जनजागृती व्हावी आणि कारवाईला वेग यावा यादृष्टीने रक्कम कमी करण्यात आल्याचेही काकाणी यांनी सांगितले आहे. मार्चपासून मुंबईकडे कोरोनाचे हॉटस्पॉट म्हणून पाहिले जात होते. पण ऑगस्टमध्ये पालिकेने मुंबईत कॊरोना बऱ्यापैकी नियंत्रणात आणला. मात्र, आता सप्टेंबरमध्ये कॊरोनाचा कहर पुन्हा वाढला आहे. कॊरोनाच्या रुग्णांमध्ये सप्टेंबरच्या पहिल्या आठवड्यात मोठी वाढ झाली आहे. तर या वाढीमागे मुंबईकरांचे बेजबाबदार वागणेच कारणीभूत असल्याचे डॉक्टरांचे-तज्ज्ञांचे म्हणणे आहे.
दरम्यान, मुंबईत मास्क न लावता फिरणाऱ्यांचे प्रमाण वाढले आहे. त्यामुळे रुग्णवाढीमागे हे मुख्य कारण मानत पालिकेने आता मास्क न लावणाऱ्यांविरोधातील कारवाई कडक करण्याचा निर्णय घेतला आहे. काकाणी यांनी दिलेल्या माहितीनुसार, मास्क न लावणाऱ्यांविरोधात सुरुवातीपासून कारवाई होत आहे. पण तरीही लोकांना त्याचा वचक बसताना दिसत नव्हता. तेव्हा आता ही कारवाई आणखी व्यापक करत कारवाईचा वेग वाढवण्यात येणार आहे. त्यासाठीच उद्यापासून विशेष मोहीम हाती घेण्यात आली आहे.
सॉलिड वेस्ट विभागाच्या अधिकारी-कर्मचाऱ्यांची अशी 15 जणांची एक विशेष टीम यासाठी तयार करण्यात आली आहे. 24 वॉर्डमध्ये प्रत्येकी 15 जणांची टीम तैनात करण्यात येणार आहे. ही टीम मास्क न लावणाऱ्यांकडून 200 रुपयांप्रमाणे दंड वसूल करणार आहे. तर दंड न भरणाऱ्यांविरोधात पोलीस करावाई करण्यात येणार आहे. त्यामुळे आता मुंबईकर दंडाच्या-कारवाईच्या भीतीने तरी मास्क वापरतात का हे पाहणे महत्वाचे ठरेल.
ऑगस्टपर्यंत 27 लाखांची वसुली
एप्रिलमध्ये पालिकेने मास्क न लावणाऱ्यांविरोधात दंडात्मक कारवाईला सुरुवात केली. त्यानुसार 9 एप्रिल ते 31 ऑगस्टपर्यत 27 लाख 48 हजार 700 रुपये इतका दंड प्रत्येकी 1 हजार रुपयांप्रमाणे वसूल केला आहे. 2 हजार नागरिकांविरोधात ही कारवाई करण्यात आली आहे. तर मास्क योग्य प्रकारे न लावणाऱ्या 10 हजार नागरिकांना समज देण्यात आली आहे.
