मुंबई - पेट्रोल आणि डिझेलच्या दराने उच्चांक गाठला आहे. केंद्र सरकार याकडे लक्ष देत नसल्याच्या निषेधार्थ युवासेनेने आक्रमक पवित्रा घेतला आहे. हेच का अच्छे दिन, असा प्रश्न उपस्थित करत युवासेनेमार्फत येत्या रविवारी (ता.३१) राज्यव्यापी आंदोलन करणार आहे. राज्यात या आंदोलनाचे तीव्र पडसाद उमटणार आहेत.
राज्यव्यापी आंदोलन -
देशात वाढत्या महागाईने सर्वसामान्यांचे कंबरडे मोडले आहे. पेट्रोल-डीझेलचे दर गगनाला भिडले आहेत. 'बहोत हो गयी महंगाई की मार', अशी घोषणा देऊन भाजपा केंद्रात सत्तेवर आले. सध्या अवास्तव दरवाढ सुरू आहे. केंद्र सरकारला जागे करण्यासाठी युवासेना आक्रमक झाली आहे. येत्या रविवारी राज्यव्यापी आंदोलनाची हाक दिली आहे. सकाळी दहा वाजल्यापासून आंदोलनाला सुरुवात होईल. युवासेना प्रमुख आदित्य ठाकरे यांच्या नेतृत्वाखाली आंदोलन होणार असून यावेळी सायकल रॅलीही काढली जाणार आहे.
भाजपा विरोधात शिवसेना -
शिवसेना आणि भाजपा यांच्यातील युती संपुष्टात आल्यानंतर एकमेकांवर आरोप प्रत्यारोपाच्या फैरी झाडल्या जात आहेत. दोन्ही पक्ष एकही संधी सोडत नाहीत. भाजपा शिवसेनेला टार्गेट करण्यासाठी राज्यातील आणि मुंबई महापालिकेवरुन टार्गेट करत आहे. शिवसेनेकडून याला आता जशास तसे प्रत्युत्तर देण्याच्या हालचाली सुरू झालेल्या आहेत. केंद्र सरकारच्या वाढती महागाई, भ्रष्टाचार आणि अन्य मुद्द्यांवर बोट ठेवत युवा सेनेने आंदोलनाचा पवित्रा घेतला आहे. आगामी स्थानिक स्वराज्य संस्थांच्या निवडणुकीच्या पार्श्वभूमीवर युवासेना आक्रमक झाली आहे. त्यामुळे भाजप विरोधात शिवसेना, असा सामना आगामी काळात पाहायला मिळणार आहे.
हेही वाचा - ..त्यामुळे आता ऊसतोड कामगारांची नोंदणी वेब पोर्टल व मोबाईल अ‍ॅपवर
