मुंबई - राज्यसभा निवडणुकीनंतर आता विधान परिषदेचा ( MLC Election 2022 ) आखाडाही रंगत आहे. विधान परिषदेच्या दहा जागांसाठी अकरा उमेदवार रिंगणात असून 20 जूनला ही निवडणूक पार पडणार आहे. राज्यसभेच्या निवडणुकीत भारतीय जनता पक्ष आणि महाविकास आघाडी या दोन्ही पक्षाकडून आपली सर्व ताकद पणाला लावण्यात आली होती. मात्र, त्या ( Rajya Sabha Election 2022 ) निवडणुकीत भारतीय जनता पक्षाने बाजी मारली. मतफुटीचा धोका टाळण्यासाठी शिवसेना आता सतर्क झाली असून आपल्या आमदारांना पवईतील एका पंचतारांकित हॉटेलमध्ये मुक्कामी पाठवले आहे. आमदारांना जाताना एसी बसची सोय करण्यात आली होती, अशी माहिती विश्वसनीय सुत्रांकडून मिळाली आहे.
सत्ताधारी महाविकास आघाडीचे प्रमुख असलेल्या पक्षाने आपल्या आमदारांना प्रमुख नेत्यांच्या बैठकीसाठी बोलावले होते. येथील बैठकीनंतर पत्रकारांशी बोलताना शिवसेना नेते अनिल देसाई म्हणाले. सर्व पक्षीय आमदारांना 20 जून रोजी विधान परिषद निवडणुकीच्या मतदानाबाबत आणि मतदान प्रक्रियेदरम्यान घ्यावयाची खबरदारी याबाबत सामान्य सूचना देण्यात आल्या होत्या. या बैठकीला शिवसेना खासदार विनायक राऊत, अनिल देसाई, एकनाथ शिंदे, अनिल परब, सुनील प्रभू यांनी हे उपस्थित होते.
'हे' उमेदवार आहेत
- भारतीय जनता पक्षाचे उमेदवार
- प्रवीण दरेकर
- राम शिंदे
- श्रीकांत भारतीय
- उमा खापरे
- प्रसाद लाड
- महाविकास आघाडी
- चंद्रकांत हांडोरे ( काँग्रेस )
- अशोक उर्फ भाई जगताप ( काँग्रेस )
- रामराजे निंबाळकर ( राष्ट्रवादी )
- एकनाथ खडसे ( राष्ट्रवादी )
- आमश्या पाडवी ( शिवसेना )
- सचिन अहिर ( शिवसेना )
- महाविकास आघाडीचे संख्याबळ
- शिवसेना - 55
- राष्ट्रवादी काँग्रेस - 53
- काँग्रेस - 44
- बहुजन विकास आघाडी - 3
- समाजवादी पार्टी - 2
- प्रहार जनशक्ती पार्टी - 2
- मार्क्सवादी कम्युनिस्ट पक्ष - 1
- शेतकरी कामगार पक्ष - 1
- स्वाभिमानी शेतकरी संघटना - 1
- क्रांतिकारी शेतकरी पक्ष - 1
- अपक्ष - 8
- सत्ताधारी महाविकास आघाडीकडे एकूण संख्याबळ- 171
- एआयएमआयएमचे दोन आमदार या निवडणुकीत कोणाला मतदान करणार याकडे ही सर्वांचे लक्ष असणार आहे.
- भाजपकडील संख्याबळ
- भारतीय जनता पक्ष - 106
- जनसुराज्य शक्ती - 1
- राष्ट्रीय समाज पक्ष - 1
- महाराष्ट्र नवनिर्माण सेना - 1
- अपक्ष - 5
- विरोधक भाजपकडे असलेले एकूण संख्याबळ - 114
अपक्ष ठरणार 'गेम चेंजर' - राज्यसभेच्या निवडणुकीत फोडाफोडीचे राजकारण करत भाजपने सहावी जागा जिंकली अशात आता विधान परिषदेच्या 10 व्या जागेसाठी भाजप किती फोडफाड करते हे पाहावे लागेल. त्यातच राज्यसभेच्या निवडणुकीत सोबत असलेल्या अपक्ष आमदारांवरच शिवसेनेने मतदान न केल्याचा संशय घेतला आहे. यावरुन अपक्ष उमेदवार नाराज असून महाविकास आघाडीसोबत रहायचे की नाही, याबाबत इशारा करावा लागेल, असा इशारा दिला आहे. विधान परिषदेच्या निवडणुकीत अपक्ष कोणती भूमिका घेणार याबाबतही चित्र स्पष्ट होणे बाकी आहे. यामुळे अपक्ष आमदाराच गेम चेंजर ठरतील, असे म्हणणे वावगे ठरणार नाही.
काँग्रेसला आपले दोन्ही उमेदवार निवडून आणण्याचा विश्वास - महाविकास आघाडीत असलेल्या तिन्ही पक्षाकडून प्रत्येकी दोन दोन उमेदवार देण्यात आले आहेत. यामध्ये शिवसेना आणि राष्ट्रवादी काँग्रेस केले आपले दोन्ही उमेदवार जिंकून आणण्यासाठी पुरेसे संख्याबळ आहे. मात्र, काँग्रेसला आपला दुसरा उमेदवार जिंकून आणण्यासाठी जवळपास दहा अपक्ष आमदारांच्या मतांची जुळवाजुळव करावी लागेल. मात्र, विधान परिषदेच्या निवडणुकीत काँग्रेसच्या दुसऱ्या उमेदवाराला जिंकण्यासाठी लागणाऱ्या मतांची जुळवाजुळव महाविकास आघाडीने केली असून या निवडणुकीमध्ये महाविकास आघाडीचाच उमेदवार विजयी होईल, असा विश्वास काँग्रेसचे नेते तथा मंत्री बाळासाहेब थोरात यांनी व्यक्त केला आहे.
संजय राऊत यांच्या वक्तव्यामुळे अपक्ष नाराज - राज्यसभेच्या निवडणुकीत राज्य सरकार सोबत असलेल्या सहा अपक्ष आमदारांनी शिवसेनेला मतदान न केल्याचा आरोप शिवसेना खासदार संजय राऊत यांनी अपक्ष आमदारांवर केला आहे. याबाबत अपक्ष आमदार देवेंद्र भुयार, संजय शिंदे, श्यामसुंदर शिंदे आणि बहुजन विकास आघाडीचे हितेंद्र ठाकूर आणि त्या पक्षाच्या इतर दोन आमदारांनी मतदान न केल्याचा आरोप करण्यात आला. यावरून अपक्ष आमदारांची महाविकास आघाडीवर नाराजी ठळकपणे पाहायला मिळाली. याबाबत देवेंद्र भुयार यांनी थेट शरद पवार, उपमुख्यमंत्री अजित पवार आणि संजय राऊत यांची भेट घेऊन आपली नाराजीही व्यक्त केली. इतर आमदारांनीही प्रसारमाध्यमांच्या माध्यमातून विकास आघाडीबाबत नाराजी व्यक्त केली आहे. त्यामुळे काँग्रेसला आपला दुसरा उमेदवार निवडून आणण्यासाठी अपक्ष आणि लहान गटातील आमदारांच्या मतांची गोळाबेरीज करावी लागणार आहे. अशावेळी अपक्ष आमदारांची मनधरणी करण्यासाठी काँग्रेससह शिवसेना आणि राष्ट्रवादी काँग्रेसला अपक्ष आमदारांची मनधरणीसाठी विशेष प्रयत्न करावे लागतील.
हेही वाचा - Voting permission denied : मुख्यमंत्र्यांना खुर्ची जाण्याची भीती- किरीट सोमैया
