मुंबई - राज्यसभेच्या ( Rajya Sabha ) सहा जागांसाठी येत्या 10 जून रोजी मतदान होणार आहे या निवडणुकीसाठी ( Election ) राज्यात उलथापालथ सुरू असून अपक्षांचा भाव वधारला आहे. या निवडणुकीत सहाव्या जागेमुळे चुरस निर्माण झाली आहे. या सहा जागांसाठी निवडणुकीच्या रिंगणात असलेल्या सात उमेदवारांची माहिती जाणून घेऊया.
- इम्रान प्रतापगढी, काँग्रेस
इमरान प्रतापगडी हे उत्तर प्रदेशातील प्रतापगड जिल्ह्यातील बेल्हा गावचे रहिवासी आहेत. त्यांचे पूर्ण नाव मोहम्मद इब्रान खान असे आहे. अलाहाबाद विद्यापीठातून त्यांनी हिंदी भाषेतून एमए केले आहे. तर पत्रकारितेचाही डिप्लोमा केला आहे. लहानपणापासून ते कव्वाली आणि शायरी यांचे कार्यक्रम करतात. शायर म्हणून त्यांची ख्याती आहे. यासाठी त्यांनी प्रतापगढी असे नाव धारण केले आहे. 2019 च्या लोकसभा निवडणुकीत मुरादाबाद मतदार संघातून प्रसिद्ध अभिनेते राज बब्बर यांना काँग्रेसचे तिकीट दिले जाणार होते. मात्र, त्यांचे तिकीट कापून राहुल गांधी यांनी हस्तक्षेप करून प्रतापगडींना तिकीट दिले. मात्र, या लोकसभा मतदारसंघात प्रतापगडींचा दारुण पराभव झाला. राजकारणाचा फारसा अनुभव नसलेल्या प्रतापगडी यांना राहुल गांधी यांनी अखिल भारतीय अल्पसंख्याक काँग्रेस सेलच्या अध्यक्षपदाची जबाबदारी त्यांच्यावर सोपवली आहे.
- प्रफुल्ल पटेल, राष्ट्रवादी कॉंग्रेस
प्रफुल्ल पटेल यांनी लोकसभा व राज्यसभा अशा संसदेच्या उभय सभागृहांचे सदस्यत्वपद भूषविले आहे. पटेल यांची राज्यसभेची ही चौथी खेप होती. पटेल हे २००० ते २००६ या काळात पूर्ण सहा वर्षे राज्यसभेचे सदस्य होते. २००६ मध्ये त्यांची राज्यसभेवर फेरनिवड झाली. २००९ मध्ये त्यांची लोकसभेवर निवड झाल्याने राज्यसभा सदस्यत्वपद रद्द झाले. २०१४ मध्ये पोटनिवडणुकीत ते पुन्हा राज्यसभेवर निवडून गेले. २०१६ ते २०२२ अशी सहा वर्षे त्यांनी परत खासदारकी भूषविली. आतापर्यंत दोनदा पूर्ण सहा वर्षे तर दोनदा कमी कालावधी त्यांना मिळाला. राष्ट्रवादी कॉंग्रेसचे महत्त्वाचे राष्ट्रीय नेते म्हणून त्यांच्याकडे पाहिले जाते. 2012 पासून ते अखिल भारतीय फुटबॉल महासंघाच्या भारतीय फुटबॉल प्रशासकीय मंडळाचे अध्यक्ष आहेत. ते 2017 पासून चार वर्षे फिफा वित्त समितीचे सदस्य राहिले आहेत.
- संजय पवार, शिवसेना
शिवसनेचे कोल्हापूरचे जिल्हाप्रमुख असलेले संजय पवार हे गेल्या 30 वर्षांपासून शिवसेनेत सक्रीय आहेत. गेल्या 9 वर्षांपासून ते कोल्हापूर जिल्हाप्रमुख म्हणून सक्रीय आहेत. स्थानिक राजकारणावर त्यांची मजबूत पकड आहे. कोल्हापुरात पक्षबांधणीचे जोमाने काम केले. आण्णासाहेब पाटील महामंडळाचे ते उपाध्यक्ष आहेत. एवढंच नाहीतर, तीन वेळा कोल्हापूर महापालिकेत शिवसेनेचे नगरसेवक निवडून आले होते. शिवसैनिक ते नगरसेवक आणि त्यानंतर जिल्हाप्रमुख असा सेनेतील त्यांचा प्रवास. उच्चशिक्षित आणि संघटन कौशल्य असल्याने पश्चिम महाराष्ट्रातील शिवसैनिकांमध्ये संजय पवार यांच्या नेतृत्त्वाची छाप आहे. तसेच, एक कडवट शिवसैनिक म्हणून त्यांची पंचक्रोशीत ओळख आहे. यासोबतच, सीमा प्रश्नी आंदोलनताही तब्बल 30 वर्षे संजय पवार सहभागी आहेत.
- संजय राऊत, शिवसेना
गेल्या काही वर्षात शिवसेनेचे फायरब्रँड नेते अशी संजय राऊत यांची ओळख झाली आहे. संजय राऊत हे 2004 पासून राज्यसभेवर खासदार म्हणून कार्यरत आहेत. शिवसेनेने या वेळेस त्यांना चौथ्यांदा उमेदवारी दिली आहे. भाजपचा प्रत्येक हल्ला परतावून लावण्याचे काम शिवसेनेच्या वतीने संजय राऊत यांनी केले आहे. 2019 मध्ये झालेल्या सत्ता नाट्यात संजय राऊत यांनी महत्त्वाची भूमिका बजावली. त्यामुळे त्यांना शिवसेनेचे चाणक्य असेही संबोधले जाऊ लागले आहे. राज्यसभेतील शिवसेनेचा चेहरा म्हणून संजय राऊत यांची ओळख आहे. म्हणूनच त्यांना चौथ्यांदा राज्यसभेत जाण्याचा मान मिळणार आहे.
- डॉक्टर अनिल बोंडे, भाजप
डॉक्टर बोंडे यांनी 1998 मध्ये शिवसेना प्रवेश केला होता. 1999 च्या निवडणुकीत त्यांना शिवसेनेने उमेदवारी दिली. मात्र, त्यांचा पराभव झाला 2004 मध्ये त्यांना शिवसेनेने उमेदवारी नाकारल्यानंतर त्यांनी 2009 मध्ये अपक्ष आमदार म्हणून निवडणूक लढवली आणि ते विजयी झाले. 14 मध्ये भाजपमध्ये प्रवेश केला. त्यांनी निवडणूक लढवून मोर्शी विधानसभा मतदारसंघातून विजय मिळवला. पांडुरंग फुंडकर यांच्या निधनानंतर बोंडे यांना कृषिमंत्री म्हणून संधी देण्यात आली होती. 2019 च्या निवडणुकीत त्यांना पराभवाला सामोरे जावे लागले.
- पियुष गोयल, भाजपा
पियुष गोयल यांची आई चंद्रकांत गोयल आणि वडील वेदप्रकाश गोयल हे भाजपाचे निष्ठावंत कार्यकर्ते होते. चंद्रकांत गोयल तीन वेळा महाराष्ट्रातील विधानसभेवर निवडून आल्या होत्या. वेदप्रकाश गोयल यांनी वाजपेयी सरकारच्या काळात केंद्रात मंत्रीपद भूषवले होते. ते भाजपचे खजिनदार होते पियुष गोयल यांनी भाजपचे खजिनदार म्हणून काही काळ काम केले. पियुष गोयल हे 2010 भाजपकडून राज्यसभेवर निवडून गेले. मोदी सरकारच्या पहिल्या टर्ममध्ये त्यांच्याकडे कोळसा आणि मंत्रालयाचा स्वतंत्र कार्यभार सोपवण्यात आला, तर सुरेश प्रभू यांनी राजीनामा दिल्यानंतर रेल्वे खात्याचा कारभार गोयल यांच्याकडे सोपविण्यात आला. मोदी सरकारच्या दुसऱ्या टर्ममध्ये पियुष गोयल यांच्याकडे रेल्वे मंत्रालय आणि कोळसा मंत्रालयाची धुरा सोपवण्यात आली. याशिवाय ते वाणिज्य खात्याचा कारभार सांभाळतात पियुष गोयल यांची तिसऱ्यांदा राज्यसभेवर निवड होणार आहे.
- धनंजय महाडिक - भाजपा
धनंजय महाडिक यांना भाजपाने राज्यसभेची उमेदवारी दिली आहे. धनंजय महाडिक यांनी आतापर्यंत 2004, 2014 आणि 2019 मध्ये लोकसभा निवडणुका लढवल्या आहेत. 2009 मध्ये विधानसभा निवडणूक लढवली होती, तर 2004 मध्ये त्यांनी शिवसेनेकडून निवडणूक लढविली होती. त्यानंतर त्यांनी राष्ट्रवादीत प्रवेश केला. 2009 मध्ये त्यांना राष्ट्रवादीने लोकसभेचे तिकीट दिले नाही. 2014 मध्ये राष्ट्रवादीने त्यांना निवडणुकीच्या रिंगणात उतरवले आणि ते विजयी झाले. 2019 मध्येही त्यांनी निवडणूक लढवली. मात्र, ते पराभूत झाले. त्यानंतर त्यांनी भाजपात प्रवेश केला. कोल्हापूर जिल्ह्यातील भाजपाला आधार द्यायचा असेल तर महाडिक घराण्याला सत्तापद देणे गरजेचं होतं. म्हणूनच महाडिक यांना उमेदवारी देऊन भाजपने जिल्ह्यात अस्तित्व टिकवण्याचा प्रयत्न केला आहे.
हेही वाचा - Pankaja Munde : फडणवीसांशी 'पंगा' पंकजा मुंडेंना नडला..? राज्यसभेनंतर विधानपरिषदेचीही उमेदवारी नाहीच
