मुंबई - केरळ राज्यातील सीपीएम पक्षाचे प्रमुख बलाकृष्णन कोडीएरी यांचा मुलगा बिनोय कोडीएरी याच्या विरोधात ओशिवरा पोलिसांनी एका 33 वर्षांच्या महिलेवर बलात्कार केल्याचा गुन्हा दाखल केला होता. या प्रकरणी मुंबईतील दिंडोशी कोर्टात बिनोय याच्या वकिलांमार्फत अटकपूर्व जामिनासाठी याचिका दाखल करण्यात आली होती. आज झालेल्या सुनावणीत बिनोय कोडीएरी यास दिंडोशी न्यायालयाने अटकपूर्व जामीन मंजूर केला.
न्यायालयाने जरी बिनोयला अटकपूर्व जामीन मंजूर केला असला तरी त्यास आठवड्यातील प्रत्येक सोमवारी ओशिवरा पोलीस ठाण्यात महिनाभर हजेरी लावावी लागणार आहे. तसेच पोलिसांना तपासत सहकार्य करावे लागणार आहे.
काय आहे प्रकरण -
दुबई मधील एका डान्स बारमध्ये ही महिला बिनोयच्या संपर्कात आली. दोघांच्या ओळखीचे रूपांतर मैत्रीत झाले. त्यानंतर बिनोयने आपण अविवाहित असून आपल्यासोबत शरीरसंबंध ठेवल्यास लग्न करू असे पीडितेला सांगितले. बिनोय च्या भूलथापांना बळी पडलेल्या पीडितने २००९ पासून २०१५ पर्यंत बिनोय सोबत शरीर संबंध ठेवले. ज्यात त्यांना अपत्य झाले.
बिनोय पिडितेला घर खर्चासाठी पैसे देत होता. मात्र, २०१५ सालापासून दुबईतील बांधकाम व्यवसायात तोट्यात असल्याचे कारण देत त्याने पीडितेला पैसे देण्यास नकार दिला. त्यानंतर पीडितेने बोनोयला लग्न करण्यास सांगितले. या दरम्यान पीडितेच्या घरच्यांना बिनोय भेटत होता. मात्र, पीडितेला स्वतःच्या घरच्यांशी ओळख करून देत नव्हता. बिनोय याच्या सोशल माध्यमांवरील माहितीवरून तो अगोदरच विवाहित असून त्यास २ मुले असल्याचे पीडितेच्या लक्षात आले. पीडितेने ओशिवरा पोलीस ठाण्यात बलात्काराचा गुन्हा दाखल केला.
