मुंबई - व्हीपी रोड आणि नागपाडा परिसरात मोठ्या प्रमाणात गर्दी दिसून येत आहे. सध्या कोरोनाच्या वाढत्या प्रमाणामुळे राज्य सरकारने काही नियम लागू केले आहेत. मात्र, या नियमांना पायदळी तुडवड लोक मोठ्या प्रमाणात या परिसरात एकत्र येत आहेत. या गर्दीचे कारण जाणून घेतल्यास एक धक्कादायक माहिती समोर आली आहे. ही गर्दी सामान किंवा भाजी खरेदीसाठी नाही तर चक्क अमली पदार्थ खरेदी करण्यासाठी होत असल्याचे समोर आले आले.
अमली पदार्थ खरेदी करण्यासाठी तरुणांची गर्दी -
आधी मी, आधी मला द्या, हे पैसे घ्या, थोडस द्या. जरा थांबा बाजूला व्हा, असे म्हणत एकमेकाच्या अंगावर पडणारी ही गर्दी अमली पदार्थ घेण्यासाठी आहे. कोणत्याही भीतीविना या परिसरात अमली पदार्थ विकले जात आहेत. या विक्रेत्यांना पोलिसांची कोणतीच भीती नसल्याचे दिसून येत आहे. दृश्यांमध्ये ही महिला दिसते हातामध्ये कसलीशी पिशवी घेऊन चालणारी. ही अमली पदार्थ विक्रेती महिला आहे. तिच्या मागे अमली पदार्थ खरेदी करण्यासाठी तरुण गर्दी करत आहेत. हा सगळा प्रकार मोबाईलमध्ये कैद करत असताना महिलेच्या लक्षात आले. मात्र, या महिलेच्या चेहऱ्यावर कोणतीच भीती दिसत नाही. याउलट महिलेने व्हिडिओ काढणाऱ्यांना धमकावल्याचे दिसून आले.
सामान्य नागरिकांना नाहक त्रास -
मुंबईत अशा प्रकारची दृश्य दिसणे हे धक्कादायक आहे. मात्र, हे वास्तव आहे. रेल्वे स्टेशनचे परिसर, जुन्या पडलेल्या इमारती, झाडेझुडपे यात बऱ्याचदा गर्दुल्ले आपला वास करत असतात आणि नशेच्या आहारी गेलेले चित्र दिसत असते. नशेच्या आहारी गेलेल्या व्यक्ती अनेकदा गुन्हेही करतात. अशा व्यक्तींमुळे सामान्य नागरिकांना नाहक त्रास होतो. पैशासाठी या व्यक्ती अनेकांवर जीवघेणा हल्लादेखील करतात. धावत्या रेल्वेवर दगड फेकून किंवा एखाद्या बांबूने हातावर फटका मारून मोबाईलदेखील ओढून घेतात. या हल्ल्यात अनेक वेळा प्रवासी जखमी होतात. इतकेच नव्हे तर काही जणांना प्राणालाही ही मुकावे लागल्याची आनेक उदाहरण माध्यमांमधून समोर आली आहेत.
हेही वाचा - मुंबईत थ्री स्टार हॉटेलमधील वेश्या व्यवसायावर छापा, दोन मॉडेल तरुणीची सुटका
