आता हा दाढीवाला कोण? नवाब मलिकांचा नवा खुलासा; त्याचा शोध घेण्याचे एनसीबीला आवाहन

समीर वानखेड यांचा जन्माचा दाखल समोर आणल्यानंतर नवाब मलिकांवर हिंदू-मुस्लीम विभाजनाची टीका करण्यात येत होती. त्यावर मलिक यांनी उत्तर दिले. ते म्हणाले, माझा प्रश्न इतकाचं आहे की, समीर दाऊद वानखेडे यांनी बोगसगिरी करून अनुसूचित जातीचे प्रमाणपत्र घेतलं आणि आयआरएस अधिकारी झाले. खुल्या प्रवर्गातील तरूणाने अनुसूचित जातीचा दाखला प्राप्त करून एका दलित मुलाचे त्याने नुकसान केले आहे.

मुंबई - राज्याची परवानगी न घेता कोरोनाचे नियम तोडून क्रुझ पार्टीवर छापा टाकण्यात आला. त्यात एक आंतरराष्ट्रीय ड्रग्ज माफिया होता. तो दाढीवाला असून तिथे नाचत होता. काही लोकांच्या म्हणण्यानुसार तो तिहार जेल आणि राजस्थानमधील जेलमध्ये होता. तो दाढीवाला माफिया कोण? दाढीवाल्याची मित्रता वानखेडेसोबत आहे का? त्याला अटक का करण्यात आली नाही, असा सवाल नवाब मलिक यांनी पत्रकारपरिषदेत केला.

दिल्लीतील पथकाने शोध घ्यावा -

कार्डिया क्रूजवर केलेली पूर्ण कारवाई ही समीर वानखेडे तसेच एनसीबीचा बनाव होता असा धक्कादायक आरोप त्यांनी आपल्या निवासस्थानी घेतलेल्या पत्रकार परिषदेतून केला आहे. काही विशेष लोकांचे फोटो एनसीबी अधिकार्‍यांकडे होते. केवळ मोजक्या लोकांवर कारवाई करण्यासाठी या पार्टीचं आयोजन केलं होतं धक्कादायक आरोप नवाब मलिक यांनी केला आहे. दिल्लीतील केंद्रीय पथक मुंबईत येत आहे. त्यांनी या दाढीवाल्याचा आणि त्याच्या मेहबुबाचा शोध घ्यावा. अन्यथा काही दिवसात मी सर्व पुरावे देणार असल्याचे नवाब मलिक म्हणाले. तसेच क्रुझची आणि तेथील नृत्याचे सीसीटीव्ही फुटेज मागवा. त्यात हा आंतरराष्ट्रीय ड्रग्ज माफिया सापडेल. त्यानेच ही पार्टी आयोजित केली होती, असा दावा मलिक यांनी केला.

समीर वानखेडेंचा फर्जीवाडा -

समीर वानखेड यांचा जन्माचा दाखल समोर आणल्यानंतर नवाब मलिकांवर हिंदू-मुस्लीम विभाजनाची टीका करण्यात येत होती. त्यावर मलिक यांनी उत्तर दिले. ते म्हणाले, माझा प्रश्न इतकाचं आहे की, समीर दाऊद वानखेडे यांनी बोगसगिरी करून अनुसूचित जातीचे प्रमाणपत्र घेतलं आणि आयआरएस अधिकारी झाले. खुल्या प्रवर्गातील तरूणाने अनुसूचित जातीचा दाखला प्राप्त करून एका दलित मुलाचे त्याने नुकसान केले आहे. मी समोर आणलेले प्रमाणपत्र खोटे असेल तर त्यांनी खरे प्रमाणपत्र दाखवावे, असे आवाहन त्यांनी केले. तसेच हा प्रकार कायद्याेन गुन्हा आहे. यासंदर्भातील कागदपत्रे प्रसारित केल्यानंतर काही अल्पसंख्याक सामाजिक संघटनांनी या कागदपत्राची आपल्याकडे मागणी केली असल्याचेही नवाब मलिक यांनी सांगितले.

भाजपचा संबंध काय?

कार्डिया कृजवर केलेली खोटी कारवाई तसेच समीर वानखेडे त्यांची खोटी कागदपत्रे समोर आणत असताना भारतीय जनता पक्षाचे नेते का अस्वस्थ होत आहेत? या सर्व प्रकरणाची भारतीय जनता पक्षाचा संबंध काय? या सर्व प्रकरणातून भारतीय जनता पक्षाच्या नेत्यांना पैसे मिळत होते का? असा सवालही नवाब मलिक यांनी पत्रकार परिषदेत उपस्थित केला आहे.