मुंबई - मुंबईतील सर्व पोलीस कार्यालयांमध्ये मराठीतून कामकाज (Work in Marathi in Police Offices) करण्याचे आदेश मुंबईचे पोलीस आयुक्त विवेक फणसाळकर (Mumbai Police Commissioner Vivek Phansalkar) यांनी दिले आहेत. कार्यालयीन कामकाजामध्ये मराठी भाषेचा सर्वाधिक उपयोग करण्यात यावा तसेच एफआयआर, आरोपपत्र आणि अहवाल हा मराठीतूनच तयार करण्यात यावा, असे आदेश पोलीस आयुक्तांनी मुंबईतील सर्व पोलीस कार्यालयांना दिले आहेत. अधिकाऱ्यांसोबत झालेल्या बैठकीत पोलीस आयुक्त यांनी हे निर्देश दिले असल्याची माहिती सूत्रांकडून मिळाली आहे.
काय दिले निर्देश - सूत्रांनी दिलेल्या माहितीनुसार, पोलीस आयुक्त कार्यालयात झालेल्या बैठकीमध्ये पोलीस आयुक्तांनी सर्व कामकाज मराठीतच करणार असल्याचे सांगितले आहे. विवेक फणसळकर यांनी यासंदर्भात स्पष्ट निर्देश दिले आहेत. मुंबई पोलीस दलातील वरिष्ठ अधिकाऱ्यांच्या बैठकीत यासंदर्भातील कडक निर्देश देण्यात आले आहेत. आयुक्तांना पाठवला जाणारा रिपोर्ट हा मराठीत असावा. नॉन मराठी अधिकाऱ्यांनी मराठीत संवाद साधावा. मराठी भाषा व्यवस्थित शिकून घ्यावी. सर्व अहवाल मराठीत पाठवावे, असे निर्देशही पोलीस आयुक्तांनी दिले आहेत.
विवेक फणसाळकर यांचा परिचय - विवेक फणसाळकर मुळचे पुण्याचे असून त्यांचे शिक्षण देखील पुण्यात झाले आहे. बीई इलेक्ट्रॉनिक्स अॅण्ड टेलिकॉम असलेले विवेक फणसाळकर यांनी एमआयटी इंजिनिअरींग कॉलेजमध्ये टेल्कोचे लेक्चरर म्हणून करीअरची सुरुवात केली होती. हे करत असताना त्यांनी युपीएससीची परीक्षा दिली आणि 1989 मध्ये महाराष्ट्र कॅडरमधून विवेक फणसाळकर यांची निवड झाली.
माजी पोलीस आयुक्त संजय पांडे यांनी देखील पदाचा पदभार स्वीकारल्यानंतर मुंबईत अनेक नवीन उपक्रम, पोलीस कर्मचाऱ्यांसाठी अनेक योजना, मुंबईकरांसाठी विविध उपक्रम- सुविधा पुरवण्यासाठी पुढाकार घेतला होता. मुंबईमध्ये सार्वजनिक मैदानाची संख्या पाहता दर रविवारी मुंबईतील काही ठराविक 13 ठिकाणी संडे स्ट्रीट नावाने उपक्रम देखील सुरू केला होता. त्याला मुंबईकरांनी चांगला प्रतिसाद देखील दिला होता.
हेही वाचा - Jayant Patil on Shinde Government : सरकारला ओबीसी आरक्षणाकडे लक्ष देण्यासाठी वेळ नाही - जयंत पाटील
