मुंबई - कोरोनाबाधित रुग्णांवर उपचारादरम्यान ऑक्सिजनची पातळी कमी झाल्यानंतर वापरण्यात येणाऱ्या इम्पोर्टेड tocilizumab injection, actemra 400 mg औषधांची त्यावर छापील किमतीपेक्षा तीन पट अधिक दराने विक्री करणाऱ्या एका व्यक्तीला मुंबई पोलिसांच्या गुन्हे शाखा क्रमांक 9 अटक केली आहे. धक्कादायक बाब म्हणजे ही औषधे बनावट असल्याचेही समोर आले आहे.
पोलिसांनी या आरोपीकडून तब्बल पंधरा इम्पोर्टेड इंजेक्शन्स आणि गोळ्या जप्त केल्या आहेत. पोलिसांनी जप्त केलेली इंजेक्शन दिल्ली येथून मुंबईत पाठवण्यात आलेली होती. अटक करण्यात आलेल्या आरोपीची पोलिसांनी चौकशी केली असता, त्याने नवी दिल्ली येथे जाऊन त्याच्या एका ओळखीच्या व्यक्तीकडून ही मूळ (ओरिजनल) इंजेक्शन्स 58 हजार रुपयांना विकत घेतली होती, असे समजले आहे.
हेही वाचा - कुरकुंभ औद्योगिक वसाहतीत मोठी आग...अग्निशमन दलाच्या तत्परतेने परिस्थिती आटोक्यात
याशिवाय, या औषधांची बनावट प्रतिकृती तो बनवत असल्याचेही समोर आले आहे. पोलीस तपासात इंजेक्शनच्या पॅकिंगसाठी वापरलेले हुबेहूब दिसणारे बॉक्स उत्तरांचल येथून प्रिंट करून आणल्याची माहिती मिळाली आहे. तसेच, इंजेक्शन ज्या काचेच्या बॉटलमध्ये पॅक करतात, तशासारख्या दिसणाऱ्या बॉटल विकत घेतल्या आणि त्यामध्ये डेरीफेलिन, डेक्सोना, डिस्टिल्ड वॉटर टाकून बनावट tocilizumab injection, actemra 400 mg सारखे दिसणारे औषध बनवल्याचा धक्कादायक प्रकार उघडकीला आला आहे.
हे औषध बाजारात कोविड अहवाल व डॉक्टरांच्या प्रिस्क्रिप्शनशिवाय मिळत नाही. मात्र, असे असतानाही अटक केलेल्या आरोपीने हे बनावट औषध आणि इंजेक्शन तब्बल एक लाख रुपये प्रति नग या भावाने विकण्यासाठी आणले होते, असे त्याने चौकशीत सांगितले आहे.
हेही वाचा - 'नीट'मध्ये माझा नंबर लागणार नाही... मराठा आरक्षणाची मागणी करत 17 वर्षीय मुलाची आत्महत्या
