मुंबई - अमेझॉन या ई-कॉमर्स कंपनीच्या अॅपमध्ये मराठी भाषेचा समावेश असावा, अशी मागणी मनसेने केली आहे. मात्र कंपनीने हे शक्य नसल्याचे सांगितले, आणि मनसे विरुद्ध अमेझॉन अशी लढाई सुरू झाली. मनसेने देखील आक्रमक होत मराठी नाही, तर अमेझॉन नाही, अशी मोहीम सुरू केली आहे. मनसेच्या मागण्या पूर्ण होईपर्यंत मोहीम सुरू राहणार असल्याचे अखिल चित्रे यांनी सांगितले.
महाराष्ट्र नवनिर्माण सेना मराठीच्या विषयावर पुन्हा एकदा आक्रमक झाली आहे. ई-कॉमर्स कंपनीच्या अॅपमध्ये मराठीचा समावेश असावा ही मागणी करत अमेझॉन विरोधात पावलं टाकली आहेत. अमेझॉनने मराठीला स्थान द्यावे, अशी मुख्य मागणी मनसेकडून करण्यात आली. मात्र, अमेझॉन व्यवस्थापनने ते मान्य करण्यास नकार दर्शवल्याने मनसेचे कार्यकर्ते आक्रमक झाले असून त्यांनी पोस्टरबाजी सुरू केली आहे. काल घाटकोपर भागातील कंपनीच्या वेअरहाऊसबाहेर मनसे कार्यकर्त्यांनी 'तुमची डिलिव्हरी, तुमची जबाबदारी','मराठी नाही; तर अमेझॉन नाही', अशा आशयाचे पोस्टर लावले आहेत.
अमेझॉन महाराष्ट्रात व्यवसाय करत आहे. परंतु त्यांची मुजोरी काही कमी होताना दिसत नाही. आम्ही शांतपणे सर्व प्रयत्न करून बघितले. पण त्यांनी माझ्यावर आणि कार्यकर्त्यांवर विविध खटले दाखल केले. दबावतंत्राचा वापर केला. सर्वात सोप्पा मार्ग म्हणजे मराठी भाषेचा समावेश करणे, तो मात्र त्यांनी केला नाही. आता आम्ही नो मराठी नो अमेझॉन ही मोहीम सुरू केली आहे. तुम्हाला आमच्या महाराष्ट्रात आमची भाषा मान्य नाही तर आम्हाला तुम्ही मान्य नाही. आणि जोपर्यंत अमेझॉन त्यांची मुजोरी थांबवत नाही तो पर्यंत आम्ही त्यांच्या विरोधातील मोहीम सुरू ठेवणार असल्याचे चित्रे यांनी स्पष्ट केले.
