मुंबई - गेली काही वर्षे राजकीय यशासाठी धडपडणारी महाराष्ट्र नवनिर्माण सेना पुन्हा एकदा ग्रामपंचायत निवडणुकीच्या पार्श्वभूमीवर विरोधी पक्षांना तोंड देण्यासाठी सज्ज झाली आहे. गाव पातळीवर आपला पक्ष पोहोचावा, यासाठी मनसेने कंबर कसली असल्याचे या निवडणुकीच्या माध्यमातून दिसून येत आहे. ग्रामपंचायत निवडणुकांसाठी अर्ज भरण्यास सुरुवात झाली आहे. मनसेनेदेखील पुढील रणनिती आखण्यासाठी आज बैठक बोलावली आहे.
मनसेचे मुख्य कार्यालय असलेल्या राजगड येथे आज 5 वाजता बैठक होणार आहे. ग्रामपंचायत निवडणुकीच्या पार्श्वभूमीवर सिंधुदुर्ग जिल्ह्यातील 8 तालुक्यातील 70 ग्रामपंचायत निवडणुकांसाठी पदाधिकाऱ्यांची आज तातडीची बैठक बोलवण्यात आली आहे. या बैठकीत मुंबई, ठाणे, पालघर जिल्ह्यातील सर्व सिंधुदुर्गवासीय महिला व पुरुष पदाधिकारी व मनसे कार्यकर्त्यांना बोलवण्यात आले आहे.
हेही वाचा - ग्रामपंचायत निवडणूक लढवण्याचा मनसेचा निर्णय
ग्रामपंचायत निवडणुका लढवण्याची घोषणा केल्यामुळे मरगळ आलेल्या मनसे कार्यकर्त्यांमध्ये पुन्हा एकदा उत्साहाचे वातावरण निर्माण झाले आहे. काही दिवसांपूर्वी मनसेने संपूर्ण ग्रामपंचायत निवडणूक लढवणार अशी घोषणा केली होती. ग्रामपंचायत निवडणूक लढवण्याच्या घोषणेमुळे मनसे नेते, पदाधिकारी, जिल्हाध्यक्ष, तालुकाध्यक्ष वेगाने तयारीला लागले आहेत.
पुणे जिल्ह्यातील 1 हजार 400 ग्रामपंचायतींच्या निवडणुकीचा कार्यक्रम जाहीर झाला आहे. मनसेच्या पॅनेलतर्फे उमेदवार मैदानात असतील. तर, राज ठाकरे 23 तारखेनंतर स्वत: पुणे जिल्ह्यात मेळावा घेणार असल्याची माहिती मिळत आहे.
राज्यात महाविकास आघाडीचे सरकार आल्यापासून मनसेने आपल्या धोरणात आमुलाग्र बदल केले आहेत. शिवसेनेची कोंडी करण्याचा मनसेचा प्रयत्न असल्याचे दिसून येत आहे. त्याचाच एक भाग म्हणून पक्षाने आता ग्रामीण भागातही लक्ष देण्यास सुरुवात केल्याचे दिसून येते. राज्यातील सुमारे चौदा हजार ग्रामपंचायतींच्या निवडणुकीचा कार्यक्रम जाहीर झाला आहे. त्यात सर्वच पक्षांबरोबर मनसे ही उतरणार म्हटल्यावर चर्चा सुरू झाली आहे.
हेही वाचा - ग्रामपंचायत निवडणुकीत मनसेला 'झिरो' जागा मिळतील - राजन साळवी
