मुंबई - 'रामायण: द लेजेंड ऑफ प्रिन्स राम' हा चित्रपट भारतातील थिएटरमध्ये रिलीज होण्याची प्रतीक्षा प्रेक्षक करत आहेत. या चित्रपटाच्या अधिकृत एक्स अकाउंटने चाहत्यांना त्यांच्या सोशल मीडिया पेजवरील आठवणींना उजाळा दिला आहे. महर्षि वाल्मिकींच्या महाकाव्यावर आधारित या जपानी अ‍ॅनिमेशन चित्रपटाच्या निर्मात्यांनी निर्मितीच्या जुन्या आठवणी ताज्या केल्या. जपानमधील कोइची सासाकी, यांनी प्रसिद्ध भारतीय अ‍ॅनिमेटर राम मोहन यांच्याबरोबर चित्रपटाचं सह-दिग्दर्शन केलं होतं. हा चित्रपट बनवण्यासाठी त्यांनी घेतलेल्या कठोर परिश्रम आणि सर्जनशीलतेची आठवण त्यांनी जागवली आहे.
कोइची सासाकी म्हणाले, "या चित्रपटाच्या अ‍ॅनिमेशन गुणवत्तेचा, त्यांच्या हालचाली आणि पात्रांच्या अभिव्यक्तीचा आम्हाला अभिमान आहे... चित्रपट केवळ दृश्यांनी बनवला जात नाही." "एखादा चित्रपट तेव्हा पूर्ण होतो जेव्हा त्यात उत्तम आवाज आणि शक्तिशाली संवाद असतात. या चित्रपटाचा आवाज १००% भारतात तयार करण्यात आला आहे, हे भारतातील सर्वोत्तम संगीतकार आणि अभिनेत्यांचे महान काम आहे, त्यासर्वांचा मी मनापासून आदर करतो", असे ते पुढे म्हणाले. "जर भारतातील लोकांना असे वाटत असेल की हे माझे आवडते रामायण आहे. यापेक्षा जास्त मोठा आनंद दुसरा असू शकत नाही."
भारतीय अ‍ॅनिमेशनचे जनक राम मोहन यांच्या कारकिर्दीतही या चित्रपटाचं विशेष स्थान आहे. त्यांचा मुलगा कार्तिक मोहन यांनी याला 'एक भव्य प्रयत्न' असल्याचं म्हटलंय. आज राम मोहन हयात नाहीत. ते जर आता असते तर हा सिनेमा भारतात रिलीज होतोय याचा खूप आनंद त्यांना झाला असता असं त्यांचा मुलगा कार्तिक याला वाटतं.
या चित्रपटाची कल्पना दिवंगत जपानी चित्रपट निर्माते युगो साको यांनी केली होती. त्यांच्या भारत भेटीदरम्यान या महाकाव्यानं ते प्रेरित झाले होते. त्यांनी एका मुलाखतीत म्हटले होते, "आकाशात झेप घेणारे हनुमान, गरुडाचं शौर्य, राम आणि लक्ष्मणाचे धाडस आणि त्यांनी लढलेले महायुद्ध... या सर्वांनी मला रोमांचित केलं. या अशा कथा आहेत ज्या प्रत्येक संस्कृतीत महत्त्वाच्या आहेत आणि कोणत्याही लोककथेचा भाग बनू शकतात. या अ‍ॅनिमेशन चित्रपटाच्या संस्मरणीय संगीतामागे महान संगीतकार वनराज भाटिया होते."
'रामायण: द लीजेंड ऑफ प्रिन्स राम' हा चित्रपट भारतातील चित्रपटगृहांमध्ये गीक पिक्चर्स इंडिया, एए फिल्म्स आणि एक्सेल एंटरटेनमेंट यांच्या मार्फत वितरित केला जाईल. हा चित्रपट २४ जानेवारी २०२५ रोजी इंग्रजी, हिंदी, तमिळ आणि तेलुगू भाषेत ४K स्वरूपात प्रदर्शित होणार आहे.
