राज्यात तृतीयपंथी मतदारांची संख्या वाढली !

मागील निवडणुकांच्या तुलनेत यंदा राज्यात तृतीयपंथी मतदारांची संख्या मोठ्या प्रमाणात वाढल्याचे समोर आले आहे.

मुंबई - मागील निवडणुकांच्या तुलनेत यंदा राज्यात तृतीयपंथी मतदारांची संख्या मोठ्या प्रमाणात वाढल्याचे समोर आले आहे. सन 2014 मध्ये तृतीयपंथी मतदारांची एकूण संख्या 972 होती. यंदा या संख्येत भर पडली असून, राज्यात 2 हजार 593 तृतीयपंथी मतदार मतदानाचा हक्क बजावणार आहेत. आज केंद्रीय निवडणूक आयोगाने विधानसभा निवडणुकांचा कार्यक्रम जाहीर केला. यावेळी ही आकडेवारी समोर आली आहे.

राज्यात विधानसभा निवडणुकीसाठी ऑक्टोबर महिन्याच्या आखेरीस नोंद केलेल्या मतदारांची एकूण संख्या 8 कोटी 94 लाख 46 हजार 211 आहे. यामध्ये 4 कोटी 64 लाख 37 हजार 841 पुरुष मतदार असून, 4 कोटी 27 लाख 5 हजार 777 महिला मतदारांचा समावेश आहे. तसेच निवडणूक आयोगाने दिलेल्या माहितीनुसार तृतीय पंथियांची 2 हजार 593 मतदार आहेत. 2014 मध्ये ही आकडेवारी केवळ 972 होती.

2014 नंतर तृतीयपंथी मतदारांची संख्या वाढली असल्याने या मतदारांचे आम्ही स्वागत करतो, असे तृतीय पंथीयांच्या विविध प्रश्नांवर काम करणाऱ्या दिशा पिंकी शेख यांनी म्हटले आहे.

निवडणूक आयोगाने आमच्या समाजातील मतदारांची दखल घेऊन आम्हाला मतदार होण्याचा अधिकार दिल्याबद्दल त्यांनी निवडणूक आयोगाचे आभार मानले आहेत. निवडणूक आयोगाने मतदार नोंदणीमध्ये तृतीयपंथीयांची जास्तीत जास्त नोंदणी करून या वर्गाला मतदानाचा अधिकार मिळवून द्यावा, अशी विनंती दिशा पिंकी शेख यांनी केली.