मुंबई - केस किंवा दाढी करायला महिन्यात दोनदा तरी सलूनमध्ये जावेच लागते. मुंबईत अनेक सलून आहेत. मात्र, सध्या कांजूरमार्ग येथील रवींद्र बिरारी यांच्या सलूनची जोरदार चर्चा अवघ्या मुंबईभर सुरू आहे. रवींद्र यांनी त्यांच्या सलूनमध्ये चक्क वाचनालयच उभारले आहे. मोबाईल हाताळण्यापेक्षा वाचनाची गोडी तरुणांना लागावी यासाठी हा उपक्रम त्यांनी सुरू केला आहे. 'हेअर क्राफ्ट' असे त्या सलूनचे नाव आहे.
मोबाईल आला आणि तरुणपिढीचे वाटोळे झाले हे शब्द सहज आपल्या कानावर पडतात. तरुणपिढीला वाचनाची गोडी लागावी यासाठी रवींद्र बिरारी प्रयत्नशील आहेत. यासाठी त्यांनी कांजूरमार्ग येथील त्यांच्या सलूनमध्ये चक्क वाचनालयच उघडले आहे. त्यांच्या सलूनमध्ये येणाऱ्या ग्राहकांना वाचण्यासाठी त्यांनी 70 पेक्षा जास्त पुस्तके ठेवली आहेत. यामुळे त्यांच्या सलूनमध्ये येताच बिरारी यांच्या ग्राहकांच्या हातात मोबाईल नाही, तर पुस्तक दिसून येतात. तसेच सलूनच्या आत येताय, तर मग मोबाईल खिशात ठेवा आणि जरा पुस्तक वाचा, असे ठणकावून बिरारी ग्राहकांना सांगतात.
त्यांच्या वाचनालयात छत्रपती शिवाजी महाराज, डॉ. बाबासाहेब आंबेडकर, लोकमान्य टिळक अशा विविध महापुरुषांची पुस्तके वाचण्यासाठी ठेवण्यात आली आहेत. त्यांच्या या उपक्रमाचे अनेक सिनेकलाकारांनीही कौतुक केले आहे. त्यांच्या या आगळ्यावेगळ्या उपक्रमामुळे तरी तरुणपिढीला वाचनाची आवड निर्माण व्हावी ही माफक अपेक्षा त्यांना आहे.
दरम्यान, माझ्या दुकानात अनेकजण मोबाईल घेऊन बसतात. या ग्राहकांचे मोबाईलचे वेड कमी व्हावे यासाठी मी माझ्या सलूनमध्ये 70 पेक्षा जास्त पुस्तके वाचण्यासाठी ठेवली आहेत. डॉ. मनोज चव्हाण यांनी मला ही संकल्पना सुचवली असल्याचे रवींद्र बिरारी यांनी सांगितले. तसे तर ही युरोपियन संकल्पना असून महाराष्ट्रात हा उपक्रम राबवणारा मी एकमेव आहे. वाचन काळाची गरज आहे, हे तरुणपिढीने ओळखावे यासाठी मी हा उपक्रम सुरू केला असल्याचे रवींद्र सांगतात.
