मुंबईतील आग संपता संपत नाही...एका महिन्यातील पाचवी मोठी आग

मागील चार महिन्यांमध्ये मुंबईत मोठ्या आगीच्या घटनांमध्ये वाढ झाली आहे. फक्त ऑक्टोबर महिन्यात मुंबईत पाच वेगवेगळ्या ठिकाणी भीषण आग लागल्याचे समोर आले आहे. यामध्ये शॉर्ट सर्किट होण्याचे प्रमाण सर्वाधिक आहे.

मुंबई - गुरुवारी रात्री नऊच्या सुमारास मुंबई सेंट्रल येथील सिटी सेंटर मॉलला आग लागली. या आगीवर नियंत्रण मिळवण्यासाठी अद्यापही प्रयत्न सुरू आहेत. आतापर्यंत घटनास्थळी मुंबईच्या महापौर किशोरी किशोरी पेडणेकर, आमदार अमीन पटेल, महानगरपालिकेचे स्थायी समितीचे अध्यक्ष यशवंत जाधव, अतिरिक्त महानगरपालिका आयुक्त (पश्चिम उपनगरं) सुरेश काकानी यांनी रात्री उशिरा भेट दिली. यावेळी त्यांनी पिरिस्थितीबाबत माहिती जाणून घेतली.

मागील चार महिन्यांमध्ये मुंबईत मोठ्या आगीच्या घटनांमध्ये वाढ झाली आहे. फक्त ऑक्टोबर महिन्यात मुंबईत पाच वेगवेगळ्या ठिकाणी भीषण आग लागल्याचे समोर आले आहे. यामध्ये शॉर्ट सर्किट होण्याचे प्रमाण सर्वाधिक आहे.

दादर बाजारपेठ

22 ऑक्टोबर 2020

दादर परिसरातील बाजारपेठेत सकाळी भीषण आग लागली होती. परंतु कोणतीही जीवितहानी झालेली नाही. सकाळी सातच्या सुमारास दादरच्या आगर बाजारातील दुकानाला आग लागली होती. अग्निशमन दल आणि जेट्टीच्या मदतीने 30 मिनिटांत या आगीवर नियंत्रण मिळवण्यात आले. परंतु काही दुकाने जळून खाक झाली. शॉर्ट सर्किटमुळे ही आग लागल्याचे नगरपालिकेच्या एका अधिकाऱ्याने सांगितले.

पवई आयआयटी मार्केट

12 ऑक्टोबर 2020

पवई आयआयटी मार्केट जंक्शन समोर असणाऱ्या एका हॉटेलला भीषण आग लागली. यामध्ये हॉटेल पूर्णपणे जळून भस्मसात झाले. संबंधित घटनेची माहिती मिळताच अग्निशमन दलाच्या दोन गाड्या घटनास्थळी दाखल झाल्या. पंजाब तडका हॉटेल हे आयआयटी मार्केट जंक्शन जवळच आहे. सकाळी हे हॉटेल बंद होते. आतून आगीचे लोळ बाहेर पडत असताना रहिवाश्यांमध्ये गोंधळ उडाला. काही वेळातच या आगीने रौद्ररुप धारण केले. यामुळे संपूर्ण जागेला आगीने वेढले आणि या दुर्घटनेत दुकान जळून खाक झाले.

मस्जिद बंदरचे कटलरी मार्केट

4 ऑक्टोबर 2020

होलसेल मार्केट म्हणून ओळख असलेल्या मस्जिद बंदर येथील कटलेरी मार्केटला सायंकाळी आग लागली होती. रात्री या आगीने भीषण रूप धारण केले. तब्बल सात तासांच्या अथक प्रयत्नांनंतर अखेर अग्निशमन दलाने या आगीवर पूर्णपणे नियंत्रण मिळवल्याची माहिती पालिकेच्या आपत्कालीन व्यवस्थापन विभागाने दिली होती. मात्र, त्यानंतर आज सकाळी ही आग पुन्हा भडकली. मुंबई पोलीस आयुक्त कार्यालयाकडून या आगीची माहिती मुंबई अग्निशमन दलाला देण्यात आली. त्यानुसार अग्निशमन दलाचे 5 फायर इंजिन आणि 4 जम्बो वॉटर टँकर घटनास्थळी दाखल झाले होते.

चेंबूर मार्केट

1 ऑक्टोबर 2020

हार्बर मार्गावरील चेंबूर स्थानकाजवळ असलेल्या मार्केटमधील एका दुकानाला पहाटे आग लागली. या दुर्घटनेत कोणीही जखमी झाले नसल्याची माहिती पालिकेच्या आपत्कालीन व्यवस्थापन विभागाने दिली. चेंबूर रेल्वे स्थानकाजवळ जनता मार्केट आहे. या मार्केटमधील दुकानाला पहाटे 5.21 वाजता आग लागली. आग लागलेल्या ठिकाणापासून जवळच रेल्वे स्थानक व इतर दुकानं असल्याने अग्निशमन दलाने लेव्हल-2 च्या आगीची घोषणा करत 10 अग्निशमन दलाची वाहने घटनास्थळी पाठवली.

फोर्ट परिसर, बाहुबली इमारत

26 ऑगस्ट 2020

फोर्ट येथील कावासाजी पटेल रोडवर असलेल्या बाहुबली इमारतीमद्ये शॉर्ट सर्किट होऊन आग लागली. या आगीत एक जण 30 ते 35 टक्के भाजला. दीपक दिलदार असे आगीत भाजलेल्या 22 वर्षीय तरुणाचे नाव आहे. त्याला उपचारासाठी बॉम्बे रुग्णालयात दाखल करण्यात आले. दरम्यान, अग्निशमन दलाने घटनेची माहिती होताच घटनास्थळी दाखल होत आगीवर नियंत्रण मिळवले. इमारतीमध्ये आग लागल्याची माहिती होताच घटनास्थळी अग्निशमन दलाच्या 5 तर जम्बो वॉटरच्या 5 गाड्या दाखल झाल्या आणि आगीवर नियंत्रण मिळवण्याचे काम सुरू झाले.

भेंडी बाजार आग प्रकरण

17 ऑगस्ट 2020

मुंबईतील गर्दीचा भाग म्हणून भेंडी बाजार ओळखला जातो. भेंडी बाजारमधील मोहम्मद अली रोड वर जुम्मा मस्जिद आहे. या मस्जिदजवळील सुतार चाळीत दुकानाला आग लागली. हा परिसर नेहमी गजबजलेला असल्याने आगीवर नियंत्रण मिळवण्यासाठी मुंबई अग्निशमन दलाचे 4 फायर इंजिन घटनास्थळी दाखल झाली. ही आग लेव्हल 2 ची असल्याची माहिती मुंबई अग्निशमन दलाकडून देण्यात आली आहे. सकाळी 11.40 वाजता लागलेल्या आगीवर दुपारी 12.56 वाजता नियंत्रण मिळवण्यात आले असून आगीत अद्याप कोणीही जखमी झाले नसल्याची माहिती पालिकेच्या आपत्कालीन व्यवस्थापन विभागाकडून देण्यात आली आहे.

चांदिवली चित्रीकरण स्टुडिओ

18 जुलै 2020

चांदिवलीतील चित्रीकरण स्टुडिओला आग लागली असून अग्निशमन दलाच्या ४ गाड्या घटना स्थळी दाखल झाल्या. तसेच आगीवर नियंत्रण मिळवण्यात यश आल्याचे अग्निशमन अधिकाऱ्याने सांगितले. चांदिवलीच्या बालाजी स्टुडिओला आग लागल्याची घटना आज दुपारी ३.३० वाजता घडली असून यामध्ये कोणतीही जीवितहानी झाली नाही. मात्र सेट जळून खाक झाल्याची प्राथमिक माहिती आहे. 'कुंमकुम भाग्य'या मालिकेचे शूटिंग सुरू असल्याची माहिती मिळत आहे. अचानक आग लागल्याने कलाकार आणि कर्मचाऱ्यांची धावपळ झाली.

पवई हिरानंदानी गार्डन

01 जुलै 2020

पवई हिरानंदानी गार्डन येथील डेल्फि इमारतीच्या पाचव्या मजल्यावरील एका कार्यालयाला पहाटे आग लागली होती. अग्निशमन दलाने आगीवर नियंत्रण मिळवल्याने मोठी दुर्घटना टळली. यामध्ये कोणतीही जीवितहानी झाली नाही. बेसमेंट, तळमजला अधिक सहा मजले अशी ही इमारत आहे. सकाळी सव्वा सहाच्या सुमारास या इमारतीच्या पाचव्या मजल्यावर आग लागली. आगीची माहिती मिळताच मुंबई अग्निशमन दलाचे 4 फायर इंजिन, 1 फोम असलेले वाहन, 4 जंबो टँकर घटनास्थळी दाखल झाले.

रघुवंशी मिल आग प्रकरण

25 जून 2020

लोअर परेल येथील सुप्रसिद्ध रघुवंशी मिल परिसरात आग लागली. मिलच्या जागी उभारण्यात आलेल्या बी-2 व्यावसायिक इमारतीत आग लागल्याचे समोर आले. तळ मजल्यापासून दुसऱ्या मजल्यापर्यंत आगीचे लोट बाहेर येत असल्याचे वृत्त होते. मात्र या ठिकाणची कार्यालयं बंद असल्याने कोणतीही जीवितहानी झाली नाही. आग विझल्यानंतर मालमत्तेचे मोठे नुकसान झाल्याचे समोर आले. शॉर्ट सर्किटमुळे आग लागली होती.

मानखुर्दमध्ये भंगाराचे दुकान जळून खाक

23 जून 2020

सकाळी 6 वाजण्याच्या सुमारास मानखुर्द मंडाळा ट्रान्झिस्ट कॅम्प, लोरोईलाही मस्जीद जवळ, घाटकोपर मानखुर्द लिंक रोड येथे एका भंगाराच्या गोदामाला आग लागली होती. घटनास्थळी मुंबई अग्निशमन दलाचे 3 फायर वाहन, 5 जम्बो वॉटर टँकर, 3 वॉटर टँकर व 2 रेस्क्यू वाहने घटनास्थळी उपस्थित होती. अग्निशमन दलाच्या जवानांनी अथक परिश्रमानंतर 9 वाजून 48 मिनिटांनी आगीवर नियंत्रण मिळवले.

क्रॉफर्ड मार्केटमध्ये आग

11 जून 2020

सायंकाळी सव्वा सहाच्या सुमारास दक्षिण मुंबईमधील क्रॉफर्ड मार्केटमधील दुकानांना आग लागली. सुरुवातीला ही आग चार ते पाच दुकानांना लागल्याचे सांगण्यात येत होते. मात्र, या दुकानात असलेले पुठ्ठ्याचे बॉक्स, पॅकिंग मटेरियल, परफ्युम आदी वस्तूंमुळे आग पसरत गेली. मार्केटमधील 12 दुकाने आणि त्यांच्या पोटमाळ्यावर आग पसरली.