मुंबई - भोसरी भूखंड घोटाळ्याप्रकरणी माजी मंत्री एकनाथ खडसे यांची पत्नी मंदाकिनी खडसे यांना मुंबई उच्च न्यायालयाने मंगळवारी आणि शुक्रवारी ईडी हजर राहण्याचे निर्देश दिले होते. त्यानुसार त्या ईडी कार्यालयात हजर झाल्या होत्या. मात्र ईडीचे कार्यालय बंद असल्याने त्यांनी परत जावे लागले. पण त्या पुन्हा येणार असल्याचे सांगितले जात आहे. दरम्यान, त्या तपास यंत्रणेत पूर्ण सहकार्य करतील, अशी माहिती मंदाकिनी खडसे यांचे वकील मोहन तळेकर यांनी दिली.
तपास यंत्रणेला सहकार्य करण्याचे न्यायालयाचे निर्देश -
पुण्यातील भोसरी भूखंड गैरव्यवहार प्रकरणात एकनाथ खडसे व त्यांच्या पत्नी मंदाकिनी खडसे यांची ईडीकडून चौकशी सुरु आहे. मंदाकिनी खडसे यांच्या विरोधात अटक वॉरंट काढण्यात आले असता त्यांनी त्या विरोधात मुंबईच्या सत्र न्यायालयात दाद मागितली होती. मात्र, सत्र न्यायालयाकडून मंदाकिनी खडसे यांना दिलासा मिळाला नसल्याने त्यांनी उच्च न्यायालयात धाव घेतली होती. याप्रकरणाची सुनावणी करताना मंदाकिनी खडसेंना मुंबई उच्च न्यायालयाने दिलासा दिला होता. त्यांना तूर्तास अटक करू नये, असे निर्देष न्यायालयाने ईडीला दिले होता.
