मुंबई - दहावीचा अभ्यासक्रम आणि मुल्यमापन पद्धतीत करण्यात आलेल्या बदलामुळे दहावीच्या विद्यार्थ्यांना कमी गुण मिळतील. यामुळे शिक्षण विभागाने हा बदल करू नये, असा इशारा शिक्षण उत्कर्ष मंचने राज्य शिक्षण मंडळाला दिला होता. मात्र, त्याकडे मंडळाकडून दुर्लक्ष करण्यात आल्याने दहावीच्या परीक्षेचा निकाल तब्बल १२.३१ टक्क्यांनी घटल्याचे आज समोर आले. याविषयी राज्यभरात विद्यार्थी, पालकांमध्ये तीव्र संताप व्यक्त केला जात आहे.
शिक्षण उत्कर्ष मंचने २८ ऑक्टोबर २०१८ रोजी याविषयी शिक्षण मंडळाकडे मागणी करत दहावीचा अभ्यासक्रम आणि मुल्यमापन पद्धतीत यंदा बदल करण्यात येऊ नये, अशी मागणी केली होती. 'ईटीव्ही भारत'मध्ये 'दहावीच्या परीक्षेतील गुणांचे 'गणित' बिघडणार" या मथळ्याखाली २८ ऑक्टोबरला बातमी प्रसिध्द करण्यात आली होती. त्यानंतर विविध विद्यार्थी संघटना, शिक्षक भारती आणि इतर संघटनांनी याविषयी शालेय शिक्षण आणि सरकारकडे मागणी केली होती, मात्र त्याकडे दुर्लक्ष करण्यात आल्याने दहावीच्या निकालात मोठी घसरण झाली आहे. त्यामुळे अकरावीच्या प्रवेशाला मुख्य शहरात राज्यातील विद्यार्थ्यांपुढे इतर मंडळातील विद्यार्थ्यांच्या अडचणी उभ्या टाकणार आहेत. यामुळे सरकारने आमचे ऐकले असते तर हा प्रसंग उद्भवला नसता, अशी प्रतिक्रिया शिक्षण उत्कर्ष मंचाचे प्रमुख सुधीर घागस यांनी 'ईटीव्ही भारत'शी बोलताना दिली.
दहावीच्या घटलेल्या निकालामुळे राज्य शिक्षण मंडळातील विद्यार्थी हे इतर मंडळाच्या तुलनेत मागे पडतील, अशी भीती शिक्षक भारतीचे कार्यवाह जालिंदर सरोदे यांनी व्यक्त केली. तर युवा सेनेच्या साईनाथ दुर्गे यांनी शिक्षण विभागाच्या कारभारवर प्रश्नचिन्ह उपस्थित करत निषेध व्यक्त केला आहे.
कशामुळे झाले गुण कमी?
या परीक्षेत पूर्व ज्ञानावर आधारीत म्हणजेच गणित, विज्ञान आणि इंग्रजी विषयासाठी नववीतील अभ्यासक्रमावर आधारीत २० गुणांचे प्रश्न विचारले होते. नववीतील अभ्यासक्रमावर आधारित असेलल्या प्रश्नांमध्ये गणितांच्या भाग-१ आणि भाग-२ अशी दोन पुस्तके आणि त्यासाठी १०० गुणांची प्रश्नपत्रिका होती. यात दोन्ही पेपरची लेखी परीक्षा ही प्रत्येकी ४० प्रमाणे ८० गुणांची आणि त्यात २० गुण हे अंतर्गत मुल्यमापनाचे म्हणजेच नववीच्या आशयावर आधारीत होते. भाग एक आणि भाग दोन मिळून घेतलेल्या चाचणी परीक्षेतील रुपांतरीत गुण हे १०, भाग एक वरील प्रात्यक्षिकासाठी प्रत्येकी ५ प्रमाणे एकूण २० असे अंतर्गत मुल्यमापनाचे गुण होते.
