मुंबई - पर्यटकांचे आकर्षण असलेल्या स्वराज्य भूमी अर्थात गिरगाव चौपाटीवर येणाऱया नागरिकांसाठी महानगरपालिकेच्या वतीने मोबाइल टॉयलेट उपलब्ध करून देण्यात आले आहे. यामुळे तब्बल ९० टक्के पाण्याची बचत होणार आहे. या मोबाइल टॉयलेटमधील यंत्रणा सौर उर्जेवर चालणारी असून पुढील सहा महिने हे टॉयलेट कार्यरत राहणार असल्याची माहिती, पालिका प्रशासनकडून देण्यात आली आहे.
असे आहे पर्यावरणपूरक टॉयलेट
स्वराज्य भूमी गिरगाव चौपाटीवर आज या सुविधेचे लोकार्पण करण्यात आले. महिलांसाठी १ आणि पुरुषांसाठी १ असे एकूण २ शौचकुपे असलेले हे प्रसाधनगृह एका वाहनावर स्थित आहे. त्यामुळे आवश्यकतेनुसार हव्या त्या ठिकाणी नेऊन प्रसाधनगृह सुविधा पुरविता येते. प्रत्येक फ्लशमध्ये सुमारे सव्वा लीटर पाण्याचा उपयोग या शौचालयात होतो. त्यामुळे २०० लीटर पाण्याचा उपयोग करुन जवळपास १०० फ्लश करता येतात. सर्वसाधारण प्रसाधनगृहांमध्ये २०० लीटर पाण्यात २० फ्लश होतात. म्हणजेच प्रत्येक फ्लशमध्ये किमान १० लीटर पाणी वापरात येते. या हिशेबाने सदर निर्वात प्रसाधनगृहामध्ये तब्बल ९० टक्के पाण्याची बचत होते. या प्रसाधनगृहातील निर्वात यंत्रणा सौर उर्जेवर कार्यरत राहते. त्यामुळे ते पूर्णपणे पर्यावरणस्नेही आहे.
२४x७ उपलब्ध राहणार
मेसर्स व्हॅकमॅन सॅनिटेशन सोल्यूशन प्रा. लि. यांच्यावतीने महानगरपालिकेला सदर फिरते निर्वात प्रसाधनगृह पुढील ६ महिन्यांसाठी विनामूल्य तत्त्वावर पुरविण्यात आले आहे. हे प्रसाधनगृह २४x७ उपलब्ध राहणार असून त्यासाठी २ वाहनचालक नेमले आहेत. सद्यस्थितीत सदर प्रसाधनगृह प्रायोगिक तत्त्वावर पर्यटकांना वापरासाठी विनामूल्य उपलब्ध आहे. चौपाटीवर देशभरातून आणि विदेशातूनदेखील पर्यटक येत असतात. त्यांच्यासाठी ही सुविधा महत्त्वाची ठरणार आहे.
यांच्या उपस्थितीत लोकार्पण
यावेळी प्रभाग समिती अध्यक्ष मीनल पटेल, स्थानिक नगरसेविका अनुराधा पोतदार, उप आयुक्त (परिमंडळ १) विजय बालमवार, डी विभागाचे सहायक आयुक्त प्रशांत गायकवाड तसेच सामाजिक कार्यकर्त्या व सिटीझन्स ऍक्शन नेटवर्क संस्थेच्या पदाधिकारी इंद्राणी मलकानी यांच्यासह विविध मान्यवर उपस्थित होते.
