मुंबई - पोटात दुखत असल्याने घाटकोपरच्या सपना या खासगी रुग्णालयात उपचारासाठी दाखल केलेल्या जे जे वैद्यकीय महाविद्यालयातील विद्यार्थिनीचा शुक्रवारी सकाळी ९ वाजण्याच्या सुमारास मृत्यू झाला. भार्गवी नरेश दुपारे असे या विद्यार्थिनीचे नाव आहे. डॉक्टरच्या हलगर्जीपणामुळे तिचा मृत्यू झाल्याचा आरोप पालकांसह नातेवाईकांनी केला आहे.
भार्गवी ही पॅरामेडिकलच्या दुसऱ्या वर्षात शिकत असून येत्या १८ तारखेला तिची परीक्षा होती. मात्र १३ जूनला रात्री २ वाजण्याच्या सुमारास तिच्या पोटात दुखू लागल्याने नातेवाईकांनी घाटकोपरच्या सपना हेल्थ केअरमध्ये उपचारासाठी दाखल केले. उपचार सुरू असताना आपण व्यवस्थित असल्याचे तिने आपल्या वडिलांना फोन वरून संवाद साधला होता. मात्र, अचानकपणे सकाळी ९ वाजता तिला कोणते तरी इंजेक्शन दिले त्यामुळे तिची तब्येत बिघडली. यानंतर तिला अस्वस्थ वाटू लागले आणि चेहरा सुजला. या सर्व प्रकारानंतर तिला आयसीयुत दाखल केले आणि तिच्यावर उपचार सुरू केले. मात्र, दुपारी पावणे एकच्या सुमारास तिचा मृत्यू झाल्याचे डॉक्टरांनी नातेवाईकांना कळवले. या मृत्यू प्रकरणी डॉक्टरांचा हलगर्जीपणा असून चुकीचे इंजेक्शन दिल्यानेच भार्गवीचा मृत्यू झाला, असा आरोप भार्गवीच्या वडिलांनी केला आहे.
भार्गवीचा मृतदेह शवविच्छेदनासाठी घाटकोपरच्या राजावाडी रुग्णालयात पाठवला होता. मात्र, जोपर्यंत त्या डॉक्टरांवर कारवाई होत नाही. तोवर मृतदेह ताब्यात घेणार नाही, अशी भूमिका नातेवाईकांनी घेतली होती. या मृत्यूबाबत सपना हेल्थ केअरशी संपर्क साधला असता डॉक्टर प्रतिक्रिया देण्यासाठी उपलब्ध होऊ शकले नाही. मृतदेहाचे शवविच्छेदन झाल्यानंतर आणि अहवाल आल्यानंतर मृत्यूचे कारण स्पष्ट होणार आहे.
