मुंबई - उपमुख्यमंत्री अजित पवार (DCM Ajit Pawar) यांनी आपले चोपदार विलास मोरे (Vilas More) यांची मुलगी आणि जावयाचा हट्ट पुरवला आहे. अजित पवार हे नेहमीच आपल्या ताठर भूमिकेसाठी प्रसिद्ध आहेत. ते सध्या अर्थसंकल्प तयारीच्या बैठका घेत असून, त्यात ते व्यस्त असतात. अजित पवार यांचे अनोखे रुप मंत्रालयातील उपस्थितांनी अनुभवले आहे. आपल्या व्यस्त कामातून वेळ काढत अजित पवार यांनी त्यांच्या कार्यालयातील चोपदाराच्या मुलीची आणि जावयाची भेटण्याची इच्छा पूर्ण केली.
- अर्थसंकल्पाच्या कामांमध्ये अजित पवार व्यस्त -
शिस्तीसाठी कडक असलेले अजित पवार नेहमीच आपली भूमिका रोखठोकपणे मांडतात. पक्षातला एखादा कार्यकर्ता किंवा सामान्य नागरिक अजित पवार यांच्याकडे काम घेऊन गेला, तर ते काम जर होणारे असेल तर अजित पवार तेथेच त्या कामाचा निपटारा करून टाकतात. त्यामुळे कामातला स्पष्टपणा ही नेहमीच अजित पवारांची ओळख राहिली आहे. त्यामुळे त्यांच्या अशा कडक भूमिकेला नेहमीच कार्यकर्ता किंवा सामान्य नागरिक ओळखून आहे. सध्या अजित पवार अर्थसंकल्पाच्या कामांमध्ये व्यस्त आहेत. राज्याच्या अर्थसंकल्पाबाबत विविध विभागाच्या बैठकांचे सत्र उपमुख्यमंत्री अजित पवार यांच्या दालनात सुरू आहेत. त्यामुळे अजित पवार हे आपल्या कामांमध्ये अगदी व्यस्त असताना दिसतात. मात्र, असे असताना अजित पवार यांनी आपले चोपदार विलास मोरे यांच्या मुलीचा आणि जावयाचा त्यांना भेटण्याचा हट्ट पुरवला आहे.
- चोपदार विलास मोरे काही दिवसात होतायेत सेवानिवृत्त -
चोपदार विलास मोरे हे येत्या काही दिवसात सेवानिवृत्त होणार आहेत. त्याआधी अजित पवार यांना भेटण्याची इच्छा त्यांची मुलगी स्नेहा हिची होती. स्नेहा हिचा विवाह अमेरिकेत आयटी कंपनीत काम करत असलेल्या गणेश साळुंके यांच्याशी चार वर्षांपूर्वी झाला. त्यानंतर स्नेहा ही अमेरिकेत स्थायिक झाली. आता पुन्हा स्नेहा आणि तिचा पती गणेश साळुंके मुंबईत आले आहेत. त्यामुळे उपमुख्यमंत्री अजित पवार यांना भेटायची इच्छा या दोघांची होती. मात्र, उपमुख्यमंत्री आपल्या कामात किती व्यस्त आहेत हे चोपदार विलास मोरे यांना माहित होत. त्यामुळे आपल्या मुलीला तुम्हाला भेटायचं आहे हे उपमुख्यमंत्र्यांना सांगायचं कसं? हे चोपदार यांना कळत नव्हतं. मात्र, शेवटी हिंमत करून विलास मोरे यांनी अजित पवारांना आपल्या मनातली इच्छा बोलून दाखवली. हे ऐकताच अजित पवारांनी देखील आपल्या व्यस्त कामातून भेट घेण्यासाठी लगेच होकार दिला.
- विलास मोरे यांच्या डोळ्यात आनंदाश्रू -
अजित पवार यांनी आपल्या व्यस्त कामातून वेळ काढून या दोघांची भेट घेत, अगदी आपुलकीने त्यांच्यासोबत चर्चा केली. दोघांची ओळख कशी झाली? लग्न कसं जुळलं? असे प्रश्न या दांपत्याला उपमुख्यमंत्र्यांनी आपुलकीने विचारले. ही भेट झाल्यानंतर अजित पवार यांचे चोपदार विलास मोरे हे देखील भारावून गेले. या भेटीनंतर त्यांच्या डोळ्यात आनंदाश्रू देखील आले.
