मुंबई - काकासाहेब चितळे यांनी केवळ व्यवसाय केला नाही तर, दुग्ध उत्पादन कसे वाढेल, तसेच चांगल्या गाई व म्हशींच्या प्रजाती कशा निर्माण होतील, यासाठी संशोधनावर भर दिला. त्यांच्या निधनाने दूरदृष्टी असलेला मेहनती व अभ्यासू उद्योजक राज्याने गमावला, अशा शब्दात मुख्यमंत्री उद्धव ठाकरे यांनी काकासाहेब चितळे यांना श्रद्धांजली वाहिली.
हेही वाचा - प्रसिद्ध चितळे उद्योग समूहाचे संचालक काकासाहेब चितळे यांचे निधन
प्रसिद्ध उद्योगपती आणि चितळे उद्योग समूहाचे संचालक काकासाहेब चितळे यांचे निधन झाले. हृदयविकाराच्या झटक्याने त्यांचे निधन झाले. वयाच्या 79 व्या वर्षी मिरज येथे त्यांनी अखेरचा श्वास घेतला.
शोकसंदेशात मुख्यमंत्री म्हणतात, अभियांत्रिकीचे शिक्षण घेतल्यानंतरही त्यांनी वडील बाबासाहेब चितळे व भावंडांसोबत चितळे उद्योग समूहामध्ये कार्यरत राहणे पसंत केले. जायंट्स वेल्फेअर फाऊंडेशन, भिलवडी सार्वजनिक वाचनालयाचे २७ वर्षांपासून अध्यक्ष, भिलवडी शिक्षण संस्थेचे विश्वस्त व संचालक, मुंबई माताबाल संगोपन केंद्राचे आश्रयदाते, विवेकानंद नेत्र चिकित्सालय, लायन्स नँबचे आश्रयदाते अशा विविध संस्थांच्या माध्यमातून त्यांनी सामाजिक क्षेत्रात योगदान दिले आहे.
दुग्ध उत्पादन आणि प्रक्रिया क्षेत्रात उद्योग उभारू इच्छिणाऱ्या अनेक नवउद्योजकांसाठी चितळे यांच्या उद्योगाची भरभराट ही नेहमीच प्रेरणादायी ठरली आहे, या शब्दात मुख्यमंत्र्यांनी काकासाहेबांना श्रद्धांजली वाहिली.
