मुंबई - गानकोकिळा लता मंगेशकर यांच्या स्मृतीप्रीत्यर्थ देण्यात येणारा पहिला पुरस्कार पंतप्रधान नरेंद्र मोदी यांना रविवारी (दि. 24 एप्रिल) प्रदान करण्यात येणार आहे. या निमित्त आज राज्यात सुरू असलेल्या भाजप आणि शिवसेना विरोधातील संघर्षानंतर पंतप्रधान नरेंद्र मोदी आणि मुख्यमंत्री उद्धव ठाकरे एकत्र येण्याची शक्यता वर्तवण्यात येत होती. मात्र, उद्धव ठाकरे या कार्यक्रमाला उपस्थित राहणार नसल्याची माहिती सूत्रांकडून मिळाली आहे. राज्यातील भाजप-शिवसेनेतील वाढता वाद पाहता मुख्यमंत्री यांनी कार्यक्रम रद्द केल्याची माहिती आहे.
गानकोकिळा लता मंगेशकर यांच्या स्मृतीप्रीत्यर्थ देण्यात येणारा पहिला पुरस्कार पंतप्रधान नरेंद्र मोदी यांना प्रदान केला जाणार आहे. याकरिता नरेंद्र मोदी स्वतः आज मुंबईत या पुरस्कार वितरण सोहळ्याला हजेरी लावणार आहेत. गानकोकिळा लता मंगेशकर यांचे फेब्रुवारी महिन्यात निधन झाले. त्यांच्या स्मृतीप्रीत्यर्थ यंदाच्या वर्षापासून लता दीनानाथ मंगेशकर पुरस्कार ( Lata Dinanath Mangeshkar Award ) देण्यात येईल, अशी घोषणा मंगेशकर कुटुंबीयांनी केली. याचे पहिले मानकरी पंतप्रधान नरेंद्र मोदी असतील, अशीही घोषणा करण्यात आली आहे. आज लता मंगेशकर यांचे वडील मास्टर दीनानाथ मंगेशकर यांची 80 वी पुण्यतिथी असून त्या दिवशीच पंतप्रधान नरेंद्र मोदी ( Prime Minister Narendra Modi ) यांना हा पुरस्कार देण्यात येणार आहे. मंगेशकर परिवार आणि मास्टर दीनानाथ मंगेशकर स्मृती प्रतिष्ठान चॅरिटेबल ट्रस्टने ( Master Dinanath Mangeshkar Smriti Pratishthan Charitable Trust ) जारी केलेल्या एका पत्रकातून ही माहिती देण्यात आली होती.
पंतप्रधान नरेंद्र मोदी थोड्याच वेळात मुंबईमध्ये दाखल होणार आहेत. यावेळी राज्याचे पर्यटन मंत्री आदित्य ठाकरे हे पंतप्रधान नरेंद्र मोदी यांचे स्वागत करण्यासाठी मुंबई विमानतळावर जाणार असल्याचीही माहिती प्राप्त झाली आहे. राज्यात सुरू असलेल्या सत्ता संघर्षानंतर पुन्हा एकदा पंतप्रधान नरेंद्र मोदी यांचा मुंबई दौरा विशेष मानला जात होता. मात्र, या दौर्‍यातही मुख्यमंत्री उद्धव ठाकरे ( Chief Minister Uddhav Thackeray ) अनुउपस्थित राहण्याने पुन्हा राजकीय चर्चांना उधाण आले आहे.
आज नरेंद्र मोदी मुंबईत - मास्टर दीनानाथ मंगेशकर स्मृती प्रतिष्ठान, पुणे ही एक सार्वजनिक धर्मादाय ट्रस्ट असून याद्वारे मागील 32 वर्षांपासून समाजकार्य केले जाते. संगीत, नाटक, कलेतील व्यावसायिक व दिग्गज सामाजिक कार्यकर्त्यांचा सन्मान या ट्रस्टद्वारे केला जातो. दरवर्षी 24 एप्रिल म्हणजेच मास्टर दीनानाथ यांच्या स्मृती दिनी हा पुरस्कार वितरणाचा कार्यक्रम आयोजित केला जातो. यंदाच्या कार्यक्रमाचे अध्यक्षपद उषा मंगेशकर यांच्याकडे असेल. पुरस्कार विजेत्यांना त्यांच्या हस्ते गौरवान्वित केले जाईल. यंदाचा हा कार्यक्रम मुंबईत होणार असून पंतप्रधान नरेंद्र मोदी त्यासाठी उपस्थित राहणार आहेत.
हेही वाचा - Sanjay Raut on Kirit Somaiya : 'हा खोटारडा माणूस' संजय राऊत यांचा किरीट सोमैयांवर निशाणा
