मुंबई - मुंबईत कोरोनाचा प्रसार होत असल्याने मास्कचा नियमित वापर करावा, असे आवाहन सरकार आणि पालिकेकडून करण्यात आले आहे. मात्र त्यानंतरही अनेक नागरिक मास्कचा वापर करत नसल्याचे निदर्शनास येत आहे. विनामास्क नागरिकांवर, रेल्वे प्रवाशांवर पालिका, क्लिनअप मार्शल तसेच पोलिसांकडून कारवाई करण्यात येत आहे. आतापर्यंत एकूण २६ लाख ८७ हजार ३३९ नागरिकांवर कारवाई करत ५४ कोटी १३ लाख ५९ हजार ८०० रुपयांचा दंड वसूल करण्यात आला आहे.
विनामास्क नागरिकांवर कारवाई -
बृहन्मुंबई महानगरपालिकेने कोविड-१९ अर्थात कोरोना विषाणू संसर्गाचा प्रसार व प्रादुर्भाव आटोक्यात आणण्याकरिता मार्च २०२०पासून विविध उपाययोजना वेळोवेळी नागरिकांच्या हितासाठी अमलात आणलेल्या आहेत. कोरोना संसर्ग रोखण्यासाठी सर्वोत्तम उपाय म्हणजे नागरिकांनी मास्क वापरणे आवश्यक आणि जरुरीचे आहे. कोरोना संसर्ग रोखण्यासाठी महानगरपालिका आयुक्तांनी विनामास्क घराबाहेर फिरणाऱ्या नागरिकांना २०० रुपये दंड ठोठावण्याचे आदेश दिले होते. तसेच बृहन्मुंबई महानगरपालिका क्षेत्रातील सर्व २४ विभाग कार्यालयांच्या हद्दीत विनामास्क फिरणाऱ्या नागरिकांवर अधिकाधिक कारवाई करण्याचे निर्देश दिले होते. त्यानुसार २० एप्रिल २०२०पासून कारवाई केली जात आहे. त्यानुसार एकूण २५ लाख ५३ हजार ५४६ नागरिकांवर कारवाई करत ५१ कोटी ४६ लाख ४०० रुपयांचा दंड वसूल करण्यात आला आहे.
पालिकेची कारवाई -
मुंबई महापालिकेने आतापर्यंत २३ लाख ५० हजार १५९ नागरिकांवर कारवाई केली आहे. या कारवाई मधून ४७ कोटी ३६ लाख ६२ हजार ८०० रुपये इतका दंड वसूल केला आहे.
पोलिसांची कारवाई -
मुंबई पोलिसांनी ३ लाख १३ हजार २८९ नागरिकांवर कारवी करत ६ कोटी २६ लाख ५७ हजार ८०० रुपये इतका दंड वसूल केला आहे. पोलिसांनी जो दंड वसूल केला आहे त्यापैकी ५० टक्के दंड पोलीस विभागाला तर ५० टक्के दंड महापालिकेला दिला जाणार आहे.
रेल्वेतील कारवाई -
फेब्रुवारीपासून मुंबईमध्ये सर्वसामान्य नागरिकांना रेल्वेमधून प्रवास करण्याची मुभा देण्यात आली. तेव्हापासून मध्य, हार्बर आणि पश्चिम रेल्वमधून प्रवास करणाऱ्या विना मास्क प्रवाशांवर करावी केली जात आहे. आतापर्यंत रेल्वेमध्ये २३ हजार ८९१ प्रवाशांवर कारवाई करत ५० लाख ३९ हजार २०० रुपये इतका दंड वसूल करण्यात आला आहे.
कारवाई नंतर मास्क मोफत -
मास्क न लावता किंवा अयोग्य रीतीने लावून फिरणाऱ्या नागरिकांना मास्कची आवश्यकता देखील समजावून सांगितली जात आहे. मास्क नसल्यास दंड केल्यानंतर संबंधित नागरिक पुन्हा विना मास्क पुढे जातात. त्यामुळे मास्क वापराच्या मूळ उद्दिष्टांची पूर्तता व्हावी, यासाठी दंड करण्यासोबत संबंधित नागरिकास एक मास्कदेखील बृहन्मुंबई महानगरपालिकेकडून मोफत पुरविला जात आहे. मास्क मोफत दिल्याची नोंद संबंधित दंडाच्या पावतीवर देखील केली जात आहे.
कोणत्या विभागात किती कारवाई -
झोन व्यक्ती दंड रुपये
झोन १ - ३,२९,९१० - ६,६५,५२,५००
झोन २ - ४,१५,८६३ - ८,३५,०४,७००
झोन ३ - ३,१५,३८९ - ६,४३,६३,४००
झोन ४ - ३,८९,५३३ - ७,८४,५२,०००
झोन ५ - २,६४,३५० - ५,३०,८६,७००
झोन ६ - २,९५,४२० - ५,९१,२८,६००
झोन ७ - ३,३९,६९४ - ६,८५,७४,९००
एकूण - २६,८७,३३९ - ५४,१३,५९,८००
