मुंबई - मुंबईमध्ये गेले वर्षभर कोरोनाचा प्रादुर्भाव आहे. हा प्रादुर्भाव कमी होत असतानाच फेब्रुवारीपासून कोरोना रुग्णांची संख्या पुन्हा वाढू लागली आहे. मुंबईत सक्रिय रुग्णांची संख्याही मोठ्या प्रमाणात वाढत आहे. मात्र त्यापैकी ८७ ते ९० टक्के रुग्ण लक्षणे नसलेले असल्याने हॉस्पिटल आणि जंबो कोविड सेंटमधील बेड अद्यापही रिक्त आहेत. मुंबईमधील जम्बो कोविड सेंटरमध्ये १६ हजार ५६१ पैकी २४ टक्के म्हणजेच तब्बल ३९३३ खाटा रिक्त आहेत. मुंबईत आढळून येणाऱ्या रुग्णांपैकी ८७ ते ते ९० टक्के रुग्ण लक्षणे नसलेले असल्याने रुग्णालयातील आणि कोविड सेंटरमधील खाटा रिक्त आहेत.
२४ टक्के खाटा रिकाम्या -
मुंबईत रुग्णांवर उपचार करता यावेत म्हणून डिसीएचसी व सीसीसी २ जंबो कोविड सेंटर उभारण्यात आले आहेत. या कोविड सेंटरमध्ये १६ हजार ५६१ खाटा आहेत. त्यापैकी १२ हजार ६२८ खाटांवर रुग्ण आहेत. जम्बो कोव्हीड सेंटरमधील सुमारे ७६ टक्के खाटा भरलेल्या आहेत. तर ३,९३३ खाटा म्हणजेच २४ टक्के खाटा रिक्त आहेत. कोविड सेंटरमधील डिसीएचसी या प्रकारात गंभीर आजार असलेल्या रुग्णांसाठी ५,६२४ खाटा आहेत. त्यापैकी ४,२९३ म्हणजेच ७६ टक्के खाटा भरलेल्या असून १ हजार ३३१ म्हणजेच २४ टक्के खाटा रिक्त आहेत. डिसीएचमध्ये गंभीर आजार नसलेल्या रुग्णांसाठी ७४८६ खाटा आहेत. त्यापैकी ५७६८ म्हणजेच ७७ टक्के खाटा भरलेल्या असून १७१८ म्हणजेच २३ टक्के खाटा रिक्त आहेत. तर सीसीसी २ मध्ये ३४५१ खाटा असून त्यापैकी २५६७ म्हणजेच ७४ टक्के खाटा भरलेल्या असून ८८४ म्हणजेच २४ टक्के खाटा रिक्त आहेत.
रुग्णालयातील खाटा रिक्त -
पालिका सरकारी आणि खासगी हॉस्पिटलमध्ये १३ हजार ११० खाटा आहेत. त्यापैकी १० हजार ०६१ खाटांवर रुग्ण आहेत. तर ३ हजार ०४९ खाटा रिक्त आहेत. आयसीयूच्या १६२७ खाटा आहेत. त्यापैकी १ हजार ३०३ खाटांवर रुग्ण असून ३२४ खाटा रिक्त आहेत. ऑक्सिजनच्या ८ हजार ९१४ खाटा आहेत. त्यापैकी ६ हजार ६९५ खाटांवर रुग्ण असून २ हजार २१९ खाटा रिक्त आहेत. व्हेंटिलेटरचे १ हजार बेड असून त्यापैकी ८३० बेडवर रुग्ण असून १७० बेड रिक्त आहेत.
हेही वाचा - कामाच्या ठिकाणी महिला संरक्षणाच्या दिशेने एक पाऊल, टास्क फोर्स नेमणार
जम्बो सेंटरमध्ये ९ हजार बेड -
महानगरपालिकेच्‍या जम्बो सेंटर्सविषयी माहिती देताना आयुक्तांनी स्‍पष्‍ट केले की, बीकेसी कोविड सेंटर टप्‍पा २ मध्ये सुमारे ७५० तर गोरेगांव येथील नेस्‍को कोविड सेंटरमध्ये १ हजार याप्रमाणे रुग्णशय्या उपलब्‍ध करुन देण्यात येत आहेत. नेस्‍कोची क्षमता ३ हजार रुग्‍णशय्यांची असून सध्‍या १ हजार बेड उपलब्‍ध आहेत. बीकेसीमध्‍ये २,१०० बेड क्षमता असून सध्‍या १ हजार बेड उपलब्‍ध आहेत. रिचर्डसन क्रूडास कोविड सेंटरमध्ये ७०० बेड उपलब्‍ध करुन देण्यात येणार आहेत. फक्त जंबो सेंटर्सचा विचार करता एकूण ९ हजार बेड उपलब्‍ध असतील, असे पालिका आयुक्त इकबाल सिंग चहल यांनी सांगितले.
हेही वाचा - पुण्यातल्या धायरी औद्योगिक वसाहतीत भीषण आग, कोट्यवधी रुपयांचे नुकसान
३६ हजार बेड वाढवणार -
फेब्रुवारीपासून पुन्हा कोरोना रुग्णांच्या संख्येत वाढ होत आहे. रुग्ण संख्या वाढत असली तरी रुग्णालयांमध्ये रुग्णशय्या रिक्त असल्याने मुंबईकरांनी घाबरून जाऊ नये असे आवाहन पालिका आयुक्त इकबाल सिंग चहल यांनी केले आहे. मुंबईत जंबो कोविड सेंटरमध्ये ९ हजार, लहान व मोठे खासगी रुग्‍णालये मिळून ७ हजार तर इतर रुग्णालयांमध्ये २० हजार अशा एकूण ३६ हजार रुग्णशय्या वाढवल्या जात असल्याचे आयुक्तांनी सांगितले.
मुंबईत २.८५ टक्के मृत्युदर -
मुंबईत काल (३० मार्च)पर्यंत कोरोना रुग्णांची संख्या ४ लाख ९ हजार ३२० वर पोहचली आहे. आतापर्यंत ११ हजजर ६७१ रुग्णांचा मृत्यू झाला आहे तर ३ लाख ४७ हजार ५३० रुग्ण बरे झाले आहेत. मुंबईत ४९ हजार १६७ सक्रिय रुग्ण आहेत. रुग्ण बरे होण्याचे प्रमाण ८५ टक्के असून रुग्ण दुपटीचा कालावधी ५० दिवस इतका आहे अशी माहिती पालिका प्रशासनाकडून देण्यात अली आहे.
हेही वाचा - पॅन-आधार लिंक नसेल तर 10 हजारापर्यंत भरावा लागू शकतो दंड; आज शेवटची तारीख
