कोल्हापूर- पोलीस अधिकारी रश्मी शुक्ला यांनी केलेल्या फोन टॅपिंगला राजकीय वळण मिळाले आहे. राष्ट्रवादीचे नेते जितेंद्र आव्हाड यांनी पोलीस अधिकारी रश्मी शुक्ला यांच्यावर केलेल्या आरोपात तथ्य आहे. भाजपमध्ये येण्यासाठी त्यांच्याकडून मला विचारणा झाली होती. मात्र जनतेला विचारात घेऊन महाविकास आघाडी सरकार सोबत राहण्याचा निर्णय घेतल्याची प्रतिक्रिया आरोग्य राज्यमंत्री राजेंद्र पाटील-यड्रावकर यांनी दिली.
पोलीस अधिकारी रश्मी शुक्ला यांनी शिरोळमध्ये निवडून आलेले अपक्ष आमदार राजेंद्र पाटील-यड्रावकर यांना भाजपमध्ये येण्यासाठी संपर्क केला होता. असा दावा राष्ट्रवादीचे जितेंद्र आव्हाड यांनी ट्विटरद्वारे केला होता. या दाव्यात तथ्य असल्याचे राजेंद्र पाटील-यड्रावकर यांनी म्हटले आहे. अपक्ष म्हणून निवडून आल्यानंतर शुक्ला यांनी आपल्याशी संपर्क केला होता. भाजपमध्ये येण्याबाबत विचारणा केली होती. मात्र आपण कार्यकर्ते आणि मतदार संघातील लोकांशी चर्चा करून निर्णय घेऊ, असा निरोप शुक्ला यांना दिला होता. जनतेशी केलेल्या चर्चेनंतर मी महाविकास आघाडी सरकारसोबत जाण्याचा निर्णय घेतला. त्यानंतर याची कल्पना आपण राष्ट्रवादीचे नेते शरद पवार आणि मुख्यमंत्री उद्धव ठाकरे यांनादेखील दिली होती, असेदेखील यड्रावकर यांनी म्हटले आहे. यड्रावकर यांच्या स्पष्टीकरणानंतर जितेंद्र आव्हाड यांनी केलेला दाव्यात पुष्टी मिळाली आहे.
हेही वाचा-रश्मी शुक्ला भाजपच्या 'एजंट', नवाब मलिक यांचा घणाघात
रश्मी शुक्ला यांच्यावर होणार आहे कारवाई-
रश्मी शुक्ला यांच्याविरोधात राज्य सरकार कायदेशीर कारवाई करणार आहे. फोन टॅपिंग प्रकरणात ही कारवाई केली जाणार आहे. तर परमबीर सिंग यांच्या विरोधातही शिस्तभंगाची कारवाई होणार आहे. परमबीर सिंग यांनी केलेल्या आरोपांची चौकशी होणार आहे. मुंबईचे माजी पोलीस आयुक्त परमबीर सिंह यांनी गृहमंत्री अनिल देशमुख यांच्यावर महिन्याला १०० कोटी रुपयांच्या वसुलीचा आरोप केला आहे. याच दरम्यान, कमिशनर ऑफ इंटेलिजन्स असताना रश्मी शुक्ला यांनी पोलीस दलातील अधिकाऱ्यांच्या भ्रष्टाचाराचा मांडलेला मुद्दा पुन्हा नव्याने चर्चेत आला. या प्रकरणात रश्मी शुक्ला यांनी काही लोकांचे फोन टॅपिंग करून भ्रष्टाचाराचा आरोप केला होता.
काय आहे रश्मी शुक्ला यांचा आरोप?
राज्य गुप्तवार्ता विभागाचे प्रमुख राहिलेल्या रश्मी शुक्ला यांनी पाठवलेल्या एका गोपनीय पत्राचा खुलासा समोर आलेला आहे. राज्यात काही आयपीएस अधिकारी हे वरिष्ठ पोलीस अधिकाऱ्यांच्या बदल्या या 'क्रीम पोस्टिंग'वर करण्यासाठी पैसे घेत असून, यासाठी त्यांनी काही एजंट नेमले असल्याचे या रिपोर्टमध्ये डॉक्टर रश्मी शुक्ला यांनी नमूद केलेला आहे. याबाबतचा अहवाल 25 ऑगस्ट 2020 रोजी तत्कालीन पोलीस महासंचालक सुबोध कुमार जैसवाल यांना पाठवण्यात आला
हेही वाचा-फोन टॅपिंग प्रकरण : रश्मी शुक्ला व परमबीर सिंग यांच्याविरोधात होणार कायदेशीर कारवाई होता.
गुप्तचर विभागाच्या तत्कालीन आयुक्त रश्मी शुक्ला यांनी पोलीस दलातील बदल्यासंदर्भात केलेला आरोप पूर्णपणे खोटा असून त्या भाजपचे एजंट आहेत, असा घणाघात राष्ट्रवादी काँग्रेसचे प्रवक्ते नवाब मलिक यांनी नुकतेच केला आहे. तसेच शुक्ला यांच्या आरोपातील सर्व बदल्या सुबोधकुमार जयस्वाल यांच्या कार्यकाळातील असल्याचे मलिक म्हणाले होते.
