कोल्हापूर Kolhapur स्वातंत्र्याचा अमृतमहोत्सव Amrit Mahotsav Of Independence देशभरात मोठ्या उत्साहात साजरा झाला. कोल्हापूरात सुद्धा अमृतमहोत्सव मोठया उत्साहात साजरा झाला. याच पार्श्वभूमीवर जिल्ह्यात अनेक उपक्रम झाले काहींनी अनोख्या पद्धतीने पंतप्रधानांच्या आवाहनाला प्रतिसाद देत अमृतमहोत्सव खास बनवला त्यातील काही महत्वाच्या उपक्रमांवर एक नजर
जिल्हाधिकारी कार्यालयाच्या प्रांगणात मुख्य शासकीय ध्वजारोहण संविधान स्तंभाचे अनावरण भारतीय स्वातंत्र्याच्या 75 व्या वर्धापन दिनानिमित्त जिल्हाधिकारी कार्यालयाच्या प्रांगणात मुख्य शासकीय ध्वजारोहण कार्यक्रम उच्च व तंत्रशिक्षण मंत्री चंद्रकांत पाटील Higher and Technical Education Minister Chandrakant Patil यांच्या हस्ते झाले. कोल्हापूर जिल्हाधिकारी कार्यालयाच्या प्रांगणात उभारण्यात आलेल्या संविधान स्तंभाचे चंद्रकांत पाटील यांच्या हस्ते अनावरण करण्यात आले. सार्वजनिक बांधकाम विभागाच्या वतीने तयार करण्यात आलेल्या या संविधान स्तंभाची उंची 15 फूट आहे.
64 व्या वर्षी रंकाळ्याभोवती 17 प्रदक्षिणा अमृतमहोत्सवी स्वातंत्र्यदिनी सलग 75 किलोमीटरचे अंतर धावण्याचा विक्रम कोल्हापूरच्या इतिहासात प्रथमच महिपती शंकर संकपाळ यांनी पूर्ण केला. रंकाळा तलावाभोवती 17 प्रदक्षिणा मारून त्यांनी 75 किलोमीटरचे अंतर 9 तास 9 मिनिटे 29 सेकंदात पूर्ण केले. वयाच्या 64 व्या वर्षी त्यांनी हा विक्रम करून कोल्हापूरच्या शिरपेचात मानाचा तुरा रोवला आहे. मध्यरात्री 12 च्या सुमाराला सुरू करण्यात आलेला हा उपक्रम सकाळी 9 वाजण्याच्या सुमाराला पूर्ण करण्यात आला.
स्वातंत्र्यदियानिमित्त अंबाबाई मंदिरात विशेष पूजा स्वातंत्र्यदियानिमित्त अंबाबाई मंदिरात Ambabai Temple Kolhapur puja विशेष पूजा करण्यात आली. हातात तिरंगा तसेच गाभाऱ्यात देशाच्या नाकाशातून देवीचे दर्शन होत होते. देवीच्या मागे सुद्धा तिरंगाचे पोस्टर लावण्यात आले होते.
पुराच्या पाण्यातून पोहत फडकविला तिरंगा स्वातंत्र्याचा अमृत महोत्सव शिरोळ तालुक्यातील काही जलतरण मंडळाच्या सदस्यांनी अनोख्या पद्धतीने साजरा केला. येथील शिरोळ तालुक्यातील उदगाव मधील कृष्णामाई जलतरण मंडळाच्या सदस्यांनी आज 14 ऑगस्ट रोजी स्वातंत्र्याच्या अमृतमहोत्सवी निमित्त हातात तिरंगा ध्वज घेऊन मिरज येथील हरिपूर मधील कृष्णा वारणा नदीच्या संगमापासून ते शिरोळ तालुक्यातील उदगाव पर्यंत तब्बल 9 किलोमीटर पोहत पार केले. कोल्हापूरातील सुद्धा काही जणांनी मिळून बलिंगा पूल ते कोल्हापूर शिवाजी पूल तब्बल 22 किलोमीटर अंतर हातात तिरंगा घेऊन पोहत पार केले.
बोबड्या बोलमध्ये स्वातंत्र्यदिनाचे भाषण चिमुकलीचा व्हिडिओ व्हायरल लहानपणी स्वातंत्र्यदिनादिवशी अनेकांनी भाषण केली असतील. अशाच एका चिमुकलीचा एक व्हिडिओ कोल्हापूरात व्हायरल झाला. ज्यामध्ये तिची आई तिच्याकडून स्वातंत्र्यदिनानिमित्त भाषण पाठ करून घेत आहे. विराज्ञी सुरज हुकिरे असे या चिमुकलीचे नाव असून हातकणंगले तालुक्यातील पट्टण कोडोली मधील ती आहे. आपल्या बोबड्या बोलद्वारे स्वतंत्रदिनाचे भाषण पाठ करताना चिमुकलीचा हा व्हिडीओ व्हायरल झाला आहे.
अडीच किलोमीटरचा ध्वज देशातील सर्वात लांब ध्वज कोल्हापुरातील इचलकरंजी शहर मँचेस्टर सिटी म्हणून ओळखले जाते आणि त्याच शहरात देशातील सर्वात मोठ्या ध्वजाची निर्मिती झाली आहे. स्वातंत्र्याचा अमृत महोत्सव संपूर्ण देशभरात साजरा झाला. त्याच पार्श्वभूमीवर इचलकरंजी येथे आमदार प्रकाश आवाडे यांच्या संकल्पनेतून 5 मीटर रुंद आणि तब्बल अडीच हजार मीटर लांबीचा हा सर्वात लांब ध्वज साकारला. आज इचलकरंजीमध्ये या ध्वजाची हजारो नागरिकांच्या उपस्थितीत रॅली काढण्यात आली. जवळपास 10 ते 15 दिवस हा ध्वज बनविण्याची प्रक्रिया सुरू होती. मँचेस्टर सिटीचे प्रतीक म्हणून आम्ही हा भव्य ध्वज साकारला असल्याचेही आवाडे यांनी म्हटले.
हर घर संविधान ठरली अभिनव उपक्रम घेणारी ग्रामपंचायत कोल्हापूरातील हातकणंगले तालुक्यातील माणगाव ग्रामपंचायतीने एक अभिनव उपक्रम राबविला. हर घर तिरंगा सोबत हर घर संविधान असा हा उपक्रम होता. गावातील लोकांना संविधान समजावे यासाठी जवळपास 2200 घरांमध्ये संविधान प्रत देण्यात आली. सरपंच राजू मगदूम यांच्या संकल्पनेतुन हा उपक्रम यशस्वी झाला. त्यांच्या या निर्णयामुळे माणगाव ही अभिनव ग्रामपंचायत ठरली आहे.
ध्वजस्तंभावर 3 वर्षानंतर तिरंगा फडकला महाराष्ट्रातील सर्वात उंच असलेल्या ध्वज स्तंभावर यावर्षी तिरंगा फडकला. कोल्हापूरातील पोलीस ग्राउंड उद्यान येथे पाच वर्षांपूर्वी या ध्वजस्तंभाजी उभारणी करण्यात आली होती. मात्र काही तांत्रिक अडचणीमुळे त्यानंतर यावर ध्वज फडकला नाही. वारंवार कोल्हापूर वासियांकडून या ध्वजस्तंभावर तिरंगा फडकवण्याची मागणी केली जात होती. मात्र सर्व तांत्रिक अडचणी दूर करून या ध्वजस्तंभावरती तिरंगा फडकला.
अनेक ठिकाणी 375 फूट लांब तिरंगा झेंड्याची पदयात्रा दरम्यान स्वातंत्र्याच्या अमृत महोत्सवी वर्षानिमित्त अनेक ठिकाणी 375 फुटाच्या ध्वजाची पदयात्रा काढण्यात आली. यामध्ये शाहूवाडी तालुक्यातील मलकापूर, पन्हाळा गड येथे ही यात्रा काढण्यात आली. अजूनही अनेक ठिकाणी अशाच पद्धतीने पद यात्रा काढण्यात आल्या.
जिल्ह्यातील अनेक नेत्यांकडून तिरंगा बाईक रॅली जिल्ह्यात अनेक राजकीय नेत्यांनी तिरंगा बाईट रॅली काढली. मोठ्या प्रमाणात आपापले कार्यकर्ते यामध्ये सहभागी झाले होते. दरम्यान, शासकीय पातळीवर सुद्धा अनेक उपक्रम राबविण्यात आले. हर घर तिरंगाच्या माध्यमातून जिल्ह्यातील हजारो घरांवर तिरंगा फडकला. अनेक धरणावर तसेच शासकीय कार्यालयांवर आकर्षक विद्युत रोषणाई करण्यात आली होती. पंतप्रधान नरेंद्र मोदी यांच्या आवाहनानंतर संपूर्ण देशभरात 75 व्या स्वातंत्र्यउत्सवानिमित्त मोठा उत्साह पाहायला मिळाला. अनेक जण घरामध्ये सर्व कुटुंबीय एकत्र अमृतमहोत्सव साजरा करताना पाहायला मिळाले. संदीप मकोटे यांच्या कुटुंबीयांनी सुद्धा मिळून हा अमृतमहोत्सव साजरा केला.
हेही वाचा Parsi New Years 2022 असा साजरा केला जातो पारशी नववर्ष दिवस जाणून घ्या इतिहास
हेही वाचा Parsi Community New Year 2022 पारशी समाजाच्या अंतिम घटका सोलापुरात बोटावर मोजण्याइतकी लोकसंख्या
