कोल्हापूर - राष्ट्रवादीच्या मागे लागून शिवसेना वारंवार तोंड फोडून घेत आहे, असा टोला भाजप प्रदेशाध्यक्ष चंद्रकांत पाटील यांनी शिवसेनेला ( Chandrakant Patil On Shivsena ) लगावला आहे. तसेच, मुख्यमंत्र्यांच्या तब्येतीची आम्हाला काळजी आहे. परंतु, राज्यात इतके प्रश्न आहेत की मुख्यमंत्र्याचा चार्ज दुसऱ्या कोणाकडे तरी देण्याची गरज आहे. मग ते कोणाकडेही द्या आमचं काही म्हणण नाही, असेही ( Chandrakant Patil On Cm Uddhav Thackeray ) ते म्हणाले. ते कोल्हापूरात बोलत होते.
पंतप्रधानांच्या कोरोना आढावा बैठकीला मुख्यमंत्री उद्धव ठाकरे हे तब्येतीमुळे उपस्थित राहू शकले नव्हते. त्या बैठकीला आरोग्य मंत्री राजेश टोपे यांना बोलू दिले नाही. याबाबत प्रसारमाध्यमांनी विचारले असता चंद्रकांत पाटील म्हणाले की, "तब्येत बिघडणे हे कोणत्याही व्यक्तीच्या हातामध्ये नसते यामुळे या बद्दल बोलने हे भारतीय संस्कृती नाही. आपण त्यांना लवकर बरे होण्यास शुभेच्छा देऊ. मात्र बाराशे कोटीची जनता असलेल्या महाराष्ट्र राज्यात अनेक प्रलंबित गंभीर प्रश्न आहेत. याकडे लक्ष देणेही गरजेचे आहे. यासाठी मुख्यमंत्र्यांनी बरे होईपर्यंत आपला चार्ज दुसऱ्या कोणाकडे तरी देण्याची गरज आहे. मग ते कोणी का असेना आमच काहीही म्हणन नाही."
"सध्या महाराष्ट्रात अनेक गंभीर प्रश्न आहेत दोन दिवसांखाली झालेल्या व्हिडीओ कॉन्फरन्सिंग मध्ये देशातील सर्व मुख्यमंत्री असताना महाराष्ट्र राज्याच्या मंत्र्यांना मग ते राजेश टोपे असो किंवा गृहमंत्री वळसे-पाटील यांना व्यवस्थित मुद्दे मांडता येणारच नाहीत. मुख्यमंत्री उद्धव ठाकरे व नरेंद्र मोदी यांचे संबंध चांगले आहेत. यामुळे चार-चार वेळा त्यांची प्रतिक्रिया विचारत असतात," असेही पाटील यांनी सांगितले.
राष्ट्रवादीच्या मागे लागून शिवसेना वारंवार तोंड फोडून...
"सध्या पाच राज्यांच्या निवडणुकांचे वादळ पहायला मिळत आहे. या निवडणुकीत गोव्यामध्ये महा विकास आघाडी स्थापन करायचा प्रयत्न सुरू होता. मात्र, काँग्रेसने याला कानाडोळा केल्याचे पहायला मिळत आहे. शिवसेना व राष्ट्रवादी काँग्रेस एकत्र येऊन लढणार असल्याचे संकेत मिळत आहेत. राष्ट्रवादी काँग्रेसच्या मागे लागून शिवसेना वारंवार आपलं तोंड फोडून घेत आहे. राष्ट्रवादी आपले मतदारांची संख्या वाढवण्यासाठी विवेक राष्ट्रीय पक्ष होण्यासाठी प्रयत्न करत आहे. त्यांच्यामागे शिवसेना जाऊन आपले डिपॉझिट जप्त करत आहे," असा टोलाही पाटील यांनी शिवसेनेला लगावला आहे.
संजय राऊत यांनी माझ्या तब्येतीची काळजी करू नये
प्रसारमाध्यामांना बोलताना शिवसेना नेते संजय राऊत यांनी भाजप नेत्यांसह चंद्रकांत पाटील यांनी एकदा दृष्टी तपासून घ्यावी, अशी टीका केली होती. त्यावर चंद्रकांत पाटील यांनी ( Chandrakant Patil On Sanjay Raut ) म्हटले की, "संजय राऊत यांनी माझ्या दृष्टीची आणि तब्येतीची काळजी करू नये त्यासाठी माझे पक्षाचे वरिष्ठ नेतृत्वाने समर्थ आहेत. संजय राऊत यांनी माझी काळजी करू नये महाराष्ट्र हा व्यवस्थित चालला आहे का नाही याकडे लक्ष द्यावे एकदा 10000 लोकांचा सर्वे करावा म्हणजे तुम्हाला कळेल," अशा शब्दांत चंद्रकांत पाटीलांनी संजय राऊतांना प्रत्युत्तर दिले आहे.
