ठाणे : देशभरात नवरात्रीचा उत्सव मोठ्या भक्ती भावाने साजरा करण्यात येत आहे. त्यातच नवरात्रीचा उत्सव तृतीयपंथिही देवीचा जागर करून देवीची उपासना करीत आहेत. विशेष म्हणजे गेल्या १४ वर्षांपासून शेकडो तृतीयपंथीय एकत्र येत हा देवीचा जागर मोठ्या भक्ती भावाने साजरा करीत असल्याची त्यांची परंपरा दिसून आली आहे.
कल्याण पूर्वेतील पत्रीपूल नजीक असलेल्या काचोरेगाव येथील नवी गोविंदवाडी तृतीयपंथीय मोठ्या समूहांची वस्ती आहे. या वस्तीत राहणाऱ्या तृतीयपंतीयांकडून नवरात्रीच्या पहिल्या दिवसापासूनच दुर्गा देवीची मनोभावे पूजा अर्चना करण्यात येते. मात्र, गेल्या दीड वर्षापासून कोरोंनाचा सामना सर्वांनाच करावा लागला. त्यातच तृतीयपंथी समाजालाही लॉकडाऊनमुळे आर्थिक फटका बसला आहे. यामुळे समाजावरील कोरोनाचे संकट कायमस्वरूपी दूर व्हावे, याकरिता त्यांनी देवीकडे साकडे घातले.
तृतीयपंथीयांचा समाज एकत्र आणण्याचा प्रयत्न
ठाणे जिल्ह्यात काचोरे गावातील नवी गोविंदवाडी परिसरात तृतीयपंथीयांची मोठी वस्ती आहे. या वस्तीत तृतीयपंथी दरवर्षीप्रमाणे दुर्गा मातेच्या मूर्तीची स्थापना करून दररोज मनोभावे पूजा करतात. विशेष म्हणजे महाराष्ट्रातील वेगवेगळ्या शहरात आमचा समाज विखुरला असून त्यांना एकत्र आणण्यासाठी हा एक प्रयत्न असल्याचे गुरूमा शालिनी यांनी ई टीव्ही भारतशी बोलताना सांगितले. तसेच कोरोनाचे संकट दूर करावे, अशी प्रार्थना आम्ही सर्व देवीकडे करत असल्याचे चंचल नावाच्या तृतीयपंथीयांनी सांगितले. तसेच देवीची पूजाअर्चा दोन वेळा करण्यात येत असल्याची माहिती गुरूमा शालिनी यांनी दिली आहे.
हेही वाचा - सीबीआयची कारवाई सुरू असताना राष्ट्रवादीचे कार्यकर्ते संतप्त; देशमुखांच्या घरात घुसण्याचा केला प्रयत्न
