औरंगाबाद - कोरोनाच्या संकटात पोलिसांना नागरिकांचीच नव्हे तर कैद्यांचीही काळजी घ्यावी लागत आहे. हत्येच्या प्रकरणातील एका कैद्याने घाटीतून उपचारादरम्यान छातीत दुखत असल्याचा नाटक केले. त्याला वाचवण्यासाठी पोलीस डॉक्टरांना बोलावण्यासाठी गेले. ही संधी साधून आरोपीने धूम ठोकल्याची घटना आज घाटीतील रुग्ण कक्ष १३ मध्ये घडली. इम्रान अमीर बेग (वय ३२ रा. काबरानगर, गारखेडा परिसर) असे त्याचे नाव आहे. हर्सुल कारागृह पोलिसांच्या हातून कैदी पळून जाण्याची ही दुसरी घटना आहे.
हर्सुल कारागृहातील २९ कैद्यांना कोरोनाची बाधा झाल्यामुळे त्यांना किलेअर्क येथील मागासवर्गीय विद्यार्थ्यांच्या शासकीय वसतीगृहाच्या कोविड सेंटरमध्ये उपचारासाठी ठेवण्यात आले होते. कारागृह पोलिसांच्या हातावर तुरी देऊन ७ जून रोजी रात्री पावणेअकराच्या सुमारास खून आणि बनावट नोटा प्रकरणातील दोन आरोपींनी पळ काढला होता. सिटीचौक पोलिसांनी त्यापैकी एकाला अटक केली आहे. मात्र, दुसरा आरोपी फरार आहे. असे असतानादेखील शुक्रवारी सकाळी पावणेसहाच्या सुमारास घाटीच्या वॉर्ड क्र. १३ मध्ये उपचार घेत असलेल्या इम्रान अमीर बेग या कैद्यानेही धुम ठोकली.
हेही वाचा... विशेष मुलाखत : 'चीनची पावलं जाणीवपूर्वक, भारताच्या वाढत्या महत्त्वाला शह देण्याची रणनीती' - नितीन गोखले
कारागृह पोलीस शिपाई राहुल विनायक राठोड हे आरोपीला सकाळी लघुशंकेसाठी हातकडीसह घेऊन गेले होते. तेथून वॉर्डातील बेडवर आणल्यानंतर कैदीने छातीत खूप दुखते व श्वास घेण्यासाठी त्रास होत असल्याचे सांगितले. त्यामुळे राठोड हे डॉक्टरांना बोलवण्यासाठी गेले. तेवढ्यात कैद्याने हातकडी उघडून तेथून धुम ठोकली. यावेळी वॉर्डात विश्रांती करत असलेल्या शिपाई प्रभाकर रख्माजी कांबळे यांना बोलावत राठोड यांनी शोध घेतला. मात्र, कैदी सापडत नसल्याचे पाहून त्यांनी अर्ध्या तासानंतर घटनेची माहिती कारागृह अधीक्षक हिरालाल जाधव यांना दिली. त्यानंतर जाधव यांच्यासह तरुंगाधिकारी भोसले, कर्मचारी अशोक लोकरे, गजानन उलागडे, संतोष गुडेवार, विश्वास गाडे यांनी कैद्याला पकडण्यासाठी धाव घेतली. या प्रकरणी राठोड यांच्या तक्रारीवरुन बेगमपुरा पोलीस ठाण्यात गुन्हा दाखल करण्यात आला आहे.
