नवी दिल्ली - काही ई-कॉमर्स कंपन्या बाजार प्रभावित करणाऱ्या किमती निश्चित करण्याचा मनमुराद आनंद घेत असल्याची केंद्रीय वाणिज्य आणि उद्योग मंत्री पियूष गोयल यांनी टीका केली. त्याचा लाखो लहान विक्रेत्यांवर (रिटेलर्स) विपरित परिणाम होत असल्याचेही गोयल म्हणाले. ते ब्राझिलियामधील ब्रिक्स वाणिज्य मंत्र्यांच्या बैठकीमध्ये बोलत होते.
पियूष गोयल म्हणाले, ई-कॉमर्स कंपन्यांनी कायद्याचे पालन करणे महत्त्वाचे आहे. डिजीटल पायभूत व्यवस्था, डिजीटल कौशल्य, संस्था या विशेषत: विकसनशील आणि कमी विकसित देशांमध्ये विकसित करण्याची गरज आहे. पुढे ते म्हणाले, संरक्षणवाद वाढत असताना जागतिक आर्थिक रचना ही गंभीर आव्हानांना सामोरे जात आहे. एकतर्फी सुधारणा केल्या जात असताना व्यापारी तणाव वाढत आहेत. अशा अनिश्चिततेच्या जगात भारताने आर्थिक संधी उपलब्ध करून देण्यात सातत्य ठेवले आहे. केंद्र सरकारने गुंतणूकदारांना आकर्षित करण्यासाठी उचललेल्या पावलांची माहिती त्यांनी यावेळी दिली.
हेही वाचा-'राज्यांनी कृषी उत्पन्न बाजार समित्या बंद करून 'ई-नाम'चा स्वीकार करावा'
विकसित देश हे मुक्त व्यापाराचा आग्रह करतात. विकसनशील देशांनी आयात शुल्क वगळावे यावर विकसित देश भर देतात. प्रत्यक्षात विकसित देश हे विकसनशील देशांवर अधिक बंधने आणतात. या कारणांनी आर्थिक अनिश्चितता वाढत जाते. त्याचा परिणाम म्हणून विकसनशील देशात व्यापार करण्याचा एकूण खर्च वाढतो.
हेही वाचा-मौल्यवान खड्यांसह दागिन्यांच्या निर्यातीत ऑक्टोबरमध्ये ५.४९ टक्के घसरण
जागतिक व्यापार संस्थेत सुधारणा करताना विकसनशील आणि विकसित अशी वर्गवारी करण्याचे मुलभूत तत्व वगळू नये, अशी त्यांनी मागणी केली. आर्थिक अनिश्चिततेने वाढते इंधन दर, व्यापार तणाव, वाढीव आयात शुल्क या कारणांनी एमएसएमई क्षेत्र अधिक असुरक्षित होते. नियमावर आधारित व्यापार व्यवस्थेचे जतन करणे गरजेचे आहे. एमएमएमई क्षेत्रासाठी कमी व्याजात पुरेसा वित्तपुरवठा उपलब्ध करून द्यायला हवा, असे गोयल म्हणाले. ब्रिक्स देशांनी सर्व प्रकारे आणि सेवांमध्ये सहकार्य वाढविण्याकडे लक्ष देणे महत्त्वाचे आहे. हे योग्य आणि संतुलित परिणामांसाठी आवश्यक असल्याचेही त्यांनी सांगितले.
