मुंबई - कोरोनाच्या धसक्याने मुंबई शेअर बाजारात आजपर्यंतची सर्वात मोठी घसरण झाली आहे. शेअर बंद होताना निर्देशांक २,९१९.२६ अंशांनी घसरून ३२,७७८.१४ वर स्थिरावला. तर निफ्टीचा निर्देशांक ८६८.२५ अंशांनी घसरून ९,५९० वर स्थिरावला आहे.
जागतिक आरोग्य संघटनेने कोरोनाला 'महामारी' म्हणून घोषित केले आहे. कोरोनाच्या जगभरातील वाढत्या प्रसाराने दलाल स्ट्रीटवर औदासिन्य पसरले आहे. दुपारी शेअर बाजार निर्देशांकात ३०२३.२४ अंशांनी घसरण झाली होती. मुंबई शेअर बाजार ३२,६७४.१६ वर पोहोचला होता. तर निफ्टीचा निर्देशांक ८८५.९० अंशांनी घसरून ९,५६८ वर पोहोचला होता.
शेअर बाजारातील १५७ कंपन्यांचे शेअर वधारले आहेत. तर २,१३५ कंपन्यांचे शेअर घसरले आहे. तर ७२ कंपन्यांचे शेअर स्थिर राहिले आहेत. कोरोनाच्या धसक्याने मुंबई शेअर बाजारात सकाळच्या सत्रात २,४०० अंशांनी घसरण झाली. तर निफ्टीत ७०० अंशांनी घसरण झाली . मुंबई शेअर बाजार २,४३७ अंशांनी घसरून ३३,२५९.६९ वर पोहोचला आहे. निफ्टीचा निर्देशांक ७३१.९० अंशांनी घसरून ९,७५६.५० वर पोहोचला.
शेअर बाजार दुपानंतर न सावरता उलट अधिक घसरण झाली आहे.
हेही वाचा-येस बँक : प्रियंका गांधींनी कपूरांना विकलेल्या पोट्रेट प्रकरणाची ईडीकडून चौकशी
आशिया खंडामधील सर्व शेअर बाजारांमध्ये घसरण सुरू झाली आहे. जागतिक आरोग्य संघटनेने बुधवारी कोरोना ही 'महामारी' असल्याची घोषणा केली. कोरोनाचा जागतिक अर्थव्यवस्थेवर परिणाम होत असल्याने जगभरातील गुंतवणूकदारांमध्ये चिंता व्यक्त होत आहे. विविध देशांसह अमेरिकेच्या शेअर बाजाराने आपत्कालीन बाब म्हणून कर्जाच्या दरात घसरण केली आहे. गेल्या काही दिवसांपासून कोविड- १९ चा जगभरात वेगाने प्रसार होत आहे. जगभरामध्ये कोरोनाच्या प्रसारामुळे आंतरराष्ट्रीय बाजारात मंदी आली आहे. तेलाच्या किमती ३० ते ३५ टक्क्यांनी कमी झाल्या आहेत. भारतानेही विदेशी नागरिकांच्या व्हिजावर बंधने घातली आहेत.
हेही वाचा-दीड वर्षातील रुपयाचा नीचांक; डॉलरच्या तुलनेत ३० पैशांनी घसरण
डॉलरच्या तुलनेत सकाळच्या सत्रात घसरण होऊन रुपया ७४.३४ वर पोहोचला आहे. ही गेल्या १७ महिन्यांतील सर्वात मोठी घसरण झाली आहे.
